१६ भदौ, विराटनगर ।
फ्रान्सको राजधानी पेरिसमा जारी पारा ओलम्पिकको पदक तालिकामा नेपाल पनि उभिएको छ । यसअघि कुनै पनि ओलम्पिकमा पदक जित्न नसकेको नेपाल जारी पारा ओलम्पिकमा भने एक कास्यसहित ५६औं स्थानमा छ । नेपाली पारा तेक्वान्दो खेलाडी पलेसा गोवर्द्धननले शुक्रबार राति पेरिस पारा ओलम्पिकमा ऐतिहासिक काँस्य पदक जितेसँगै नेपाल पनि पदक तालिकामा उभिन सफल भएको हो ।
यो समाचार तयार पार्दासम्म पारा ओलम्पिकको पदक तालिकामा चीनको बर्चश्व छ । चीनले २३ स्वर्ण, १८ रजत र सात कास्य गरी कुल ४८ पदक जितेको छ । शीर्ष स्थानको चीन बेलायतभन्दा २० पदकले अगाडि छ । दोस्रो स्थानको बेलायतले १३ स्वर्ण, नौ रजत र ६ कास्य जितेको छ । तेस्रो स्थानको ब्राजिलले आठ स्वर्णसहित २३ पदक जितेको छ भने अस्ट्रेलियाले ६ स्वर्णसहित १४ पदक जित्दा पाँचौं स्थानको नेदरल्यान्ड्सले ६ स्वर्णसहित १० पदक जितेको छ ।
नेपाली खेलाडीले अर्को एउटा पदक थप्नेगरी सोमबार दिउँसो प्रतिस्पर्धा गर्ने छन् । भोलि दिउँसो १ बजे पौडीका भीमबहादुर कुमालले खेल्ने छन् । उनले पुरुष ५० मिटर फ्रिस्टायलमा सहभागिता जनाउने छन् । गोरखा घर भएका ४० वर्षीय भीमले उक्त स्पर्धामा जर्मन, इटालियन र अमेरिकन खेलाडीसँग प्रतिस्पधाए गर्ने छन् । पारा पौडीका भीमले भने वाइल्ड कार्डमार्फत पारालिम्पिकमा खेल्ने अवसर पाएका थिए ।
नेपाली पारा तेक्वान्दो टोली इङल्यान्डको म्याचेस्टरमा १ महिनाको तयारी प्रशिक्षणपछि जुलाई २५ तारिखमा पेरिस पुगेको थियो । पेरिस पारा ओलम्पिकमा नेपालका तीन खेलाडी सहभागी भएका छन् । नेपालका पारा तेक्वान्दो खेलाडी भरतसिंह महता भने आफ्नो पहिलो खेलमै पराजित भएका थिए ।
भरत, के–४४, पुरुष ५८ के.जी मुनि तौल समूहअन्तर्गत राउन्ड अफ १६ मा जापानका मित्सुया टनाकासँग १९–३ ले पराजित भएका थिए । यस हारसँगै ‘वाइल्ड कार्ड’ मार्फत पेरिस पारालम्पिक खेल्ने अवसर पाएका भरतको पेरिस पारालम्पिक २०२४ यात्रा पहिलो खेलमै समाप्त भएको थियो ।
तेक्वान्दोकी पलेशाले भने शुक्रबार राति भएको के–४४ वर्गअन्तर्गत महिला ५७ केजीमुनिको स्पर्धामा पलेशाले सर्वियाकी मारिजा मिचेभलाई १५–८ ले पराजित गर्दै कास्य जितेकी थिइन् । २१ वर्षीया पेलिसाले देशलाई दिएको यो पदक नेपाली खेल इतिहासको अहिलेसम्मकै ठुलो उपलब्धि हो । ओलम्पिकको ६० वर्षे इतिहासमा नेपाल सहभागितामै सीमित थियो ।
पाराओलम्पिकमा पदक जितेसँगै पलेशाले नेपाल सरकारबाट ६५ लाख रुपैयाँ पुरस्कार पाउने छिन् । राष्ट्रिय खेलकुद विकास नियमावली २०७९ अनुसार पारालिम्पिकमा व्यक्तिगततर्फ स्वर्ण जित्नेलाई एक करोड ३० लाख रुपैयाँ पुरस्कार दिने व्यवस्था गरिएको छ । यस्तै, रजत जित्नेलाई ९७ लाख र कांस्य जित्नेलाई ६५ लाख रुपैयाँ पुरस्कार दिने व्यवस्था छ ।
यही व्यवस्थाअनुसार पलेशाले ६५ लाख रुपैयाँ सरकारबाट प्राप्त गर्ने भएकी हुन् । यस्तै, पलेशाका प्रशिक्षक कविराज नेगी लामाले पाँच लाख ८५ हजार रुपैयाँ पुरस्कार प्राप्त गर्नेछन् । नेपाल तेक्वान्दो संघले भने ११ लाख ९२ हजार रुपैयाँ प्राप्त गर्नेछ ।
