प्यालेस्टाइनका प्रधानमन्त्रीले किन दिए राजीनामा ?

१५ फागुन, एजेन्सी।
प्यालेस्टाइनी मन्त्रिपरिषदका सबै सदस्यले राजीनामा दिएका छन् । गाजामा चर्को संकटको समयमा केही गर्न नसकेको भन्दै प्रधानमन्त्रीसहित सबै मन्त्रीले राजीनामा दिएका हुन् । प्रधानमन्त्री मोहम्मद श्तायेहले सोमबार राष्ट्रपति महमुद अब्बाससमक्ष आफ्नो सरकारको राजीनामा बुझाएको बताएका हुन् । यो निर्णय गाजापट्टीमा प्यालेस्टाइनी जनताविरुद्धको आक्रमणसँग सम्बन्धित राजनीतिक, सुरक्षा र आर्थिक घटनाक्रमका कारण रहेको उनले बताएका छन् ।

श्तायेहको सरकार सन् २०१९ अप्रिलमा राष्ट्रपतिको आदेशद्वारा गठन गरिएको थियो । सरकारलाई प्यालेस्टाइनी मेलमिलाप र निर्वाचनको तयारीको जिम्मा दिइएको थियो । सोमबार लिखित रूपमै राजीनामा बुझाएको उनको भनाइ छ । यसैबीच अमेरिकी राष्ट्रपति जो बाइडेनले आगामी हप्ताभित्र इजरायल र हमासबीच युद्धविराम हुने बताएका छन् ।

अमेरिकाको न्यूयोर्कमा भएको एक अन्तरक्रियात्मक कार्यक्रममा बाइडेनले युद्धविरामका लागि प्रयास जारी रहेको भन्दै आगामी सोमबारभित्र युद्धविराम हुने बताएको सीएनएनले जनाएको छ । बाइडेनले आफ्ना सुरक्षा सल्लाहकारले आफूहरु युद्धविरामको नजिक रहेको बताएको उल्लेख गर्दै उनले आउँदो सोमबारभित्र युद्धविराम हुने विश्वास व्यक्त गरेका छन् ।

अमेरिकी अधिकारीहरुका अनुसार हमासको कब्जामा रहेका इजरायली बन्धकको रिहाइको सहमति भइसके पनि इजरायली सेना गाजाबाट फिर्ता हुने विषयमा कुरा मिल्न बाँकी छ । हालै फ्रान्सको राजधानी पेरिसमा अमेरिका, इजिप्ट र इजरायली खुफिया एजेन्सीका प्रमुखहरुबीच भएको छलफलमा हमासले इजरायली सैनिकको पूर्णफिर्तिलाई प्रमुख मुद्दा बनाएको बारे जानकारी गराइएको थियो ।

यसअघिको युद्धविराममा हमासले इजरायलमा रहेका प्यालेस्टाइनी बन्दीको रिहाइलाई आफ्नो मागका रुपमा अघि सारेको थियो। तर, अहिले इजरायली सैनिकको फिर्तीको मागले युद्धविराममा सहमति नजुटेको हो । इजरायल आफै भने युद्धविराम गर्न नचाहिरेको अधिकारीहरुले जनाएका छन् ।

इजरायलले गाजा पूर्णरुपमा हमासमुक्त बनाउने र नयाँ प्रशासनसहितको सहर बनाउने योजनामा जुटेको छ । लामो समयदेखि गाजामा इजरेली आक्रमणका कारण लाखौं मानिस विस्थापित भएका छन् भने २९ हजारभन्दा बढिले ज्यान गुमाइसकेका छन् । पछिल्लो तथ्याङ्कअनुसार त्यसयता इजरायली सेनाले गरेको आक्रमणमा २९ हजार ६९२ प्यालेस्टाइनीको मृत्यु भएको छ भने ६९ हजार ८७९ जना घाइते भएका छन् ।

यसअघि इजिप्ट, कतार र संयुक्त राज्यले अमेरिकाले इजरायल र हमासबीच एकहप्ता लामो युद्धविराम मध्यस्थता गरेका थिए । सो युद्धविराममा प्यालेस्टिनी कैदीहरू र इजरायली बन्धकहरू आदानप्रदानका साथै गाजामा थप मानवीय सहायता वितरण गरिएको थियो।