३ चैत , काठमाण्डौ ।
प्रधानमन्त्री र संघीय सरकारलाई नै सिधा चुनौती दिने बालेन्द्र शाह, हर्क साम्पाङ, रवि लामिछाने नेपाली गणतन्त्रका फूलहरु हुन् । यी फूलहरुले देशमा स्वतन्त्रपूर्वक फुल्न पाउनु पर्छ र सुवास छर्न पाउनु पर्छ भन्ने आशयसहितको अभिव्यक्ति पूर्वप्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्डले व्यक्त गर्दै आएका छन् ।
तर अहिलेको सरकार विशेषगरी केपी शर्मा ओलीले यस्ता फूलहरुलाई निमोठ्न प्रयास गरिरहेको आशयसहितको आरोप उनको छ । ओली नेतृत्वको सरकारले जनताको अभिब्यक्तिको अधिकार खोस्नेदेखि चरम निराशा बढाएकाले अहिले देशमा व्यवस्था उल्ट्याउने प्रयास बढेको आरोप पनि प्रचण्डले लगाएका छन् ।
तर ओलीमाथि यस्ता आरोप लगाइरहँदा उनी स्वयंपनि सोही बाटोमा हिडेको देखिएका छन् । एकातिर प्रचण्डको अभिब्यक्तिको विरोध गर्दै उनको तस्बिर जलाएकै आरोपमा एक स्थानीय नेता पक्राउ परेका छन् भने अर्कातिर उनको परिवारमाथि टिप्पणी गरेको आरोपमा साइबर ब्युरोमा उजुरी समेत परेको छ ।
प्रचण्ड’ माथि सामाजिक सञ्जालबाट आपत्तिजनक प्रकारका टिप्पणी बढेपछि साइबर ब्युरोमा उजुरी परेको बताइएको छ । प्रचण्डले राजसंस्थाविरुद्ध आक्रामक अभिव्यक्ति दिएपछि पछिल्ला तीन दिनयता प्रधानमन्त्री केपी शर्मा ओलीलाई छाडेर राजावादीहरूले सामाजिक सञ्जालमा प्रचण्डको तीव्र विरोध गरिरहेका छन् ।
विभिन्न फेसबुकलगायत सामाजिक सञ्जालका प्लेटफर्ममा फेक आईडीसमेत बनाएर प्रचण्ड परिवारको चरित्रहत्या गर्ने खालका सामग्री राख्नेदेखि अत्यन्त आपत्तिजनक कुराहरू समेत पोष्ट गरिएपछि माओवादी कार्यकर्ताले साइबर ब्युरो गुहारेका हुन् ।
मेचीमहाकाली अभियान, विकास महर्जन दीपु, सविना मोक्तान, कुलबहादुर थापाजस्ता आईडीहरूबाट प्रचण्ड तथा उनको परिवारका छोरी बुहारीहरूको बारेमा आपत्तिजनक पोष्टहरू गरिएका छन् ।
वाईसीएल नेपालका केन्द्रीय सचिव हरि ढकालले आपत्तिजनक र घृणित सामग्रीहरु पोष्ट गर्ने आईडीको पहिचान गरी त्यस्ता व्यक्तिमाथि कानूनबमोजिम कारवाही गर्न प्रमाणसहित केही साथीले साइबर ब्युरोमा जाहेरी दिएको बताएका छन् ।
साइबर ब्युरोले केही आईडी पहिचान भएको र कानूनबमोजिम अनुसन्धान भइरहेको जनाएको छ । उता ‘प्रचण्ड’को फोटो जलाउने राप्रपा निकट युवा संगठनका नेता निराजन बमलाई प्रहरीले पक्राउ गरेको छ ।
भरतपुरबाट पक्राउ परेका बमलाई हेटौंडा लगिएको मकवानपुरका प्रहरी प्रमुख एसपी विश्वराज खड्काले बताएका छन् । बमले राष्ट्रिय प्रजातान्त्रिक युवा संगठन मकवानपुरको जिल्ला अधिवेशनका क्रममा प्रचण्डको तस्बिर जलाएका थिए ।
अधिवेशनको सम्बोधनका क्रममा उनले लाइटर बालेर फोटो जलाएका थिए, जसको भिडियो सामाजिक सञ्जालमा भाइरल बनेको थियो । पक्राउ परेपछि बमले सामाजिक सञ्जालमार्फत आफूलाई चितवन जिल्ला प्रहरी कार्यालयले नियन्त्रणमा लिएको जानकारी गराएका छन्।
उनले “गणतन्त्र मुर्दाबाद, राजसंस्था जिन्दावाद“ भन्दै आफ्नो अभिव्यक्ति दोहो¥याएका छन्। शनिबार प्रचण्डको फोटो जलाएपछि बमले सामाजिक सञ्जालमा लेखेका थिए कि प्रचण्डको अभिव्यक्तिले देशलाई हिंसातर्फ धकेल्न खोजेको छ ।
उनले दरबार हत्याकाण्ड, १७ हजार मानिसको हत्या, तथा भ्रष्टाचारको विषय उठाउँदै प्रचण्डलाई प्रश्न गरेका थिए ।
