विराटनगर : आइतबारको प्रदेशसभा बैठकमा प्रदेश १ का सामाजिक विकासमन्त्री जीवन घिमिरेले प्रदेशको खेलकुदको सम्बन्धमा व्यवस्था गर्न बनेको विधेयक २०७५ पेश गरे । सभामुख प्रदीपकुमार भण्डारीले विधेयकमाथिको सामान्य छलफल अघि बढाउँदै बोल्ने सांसदलाई सात मिनेटको समय छुट्याएको जानकारी गराए ।
तेस्रो नम्बरमा बोल्ने पालो पाएकी सत्तापक्षकै सांसद सरिता थापाले भने राजधानी र नामको बिषयमा धेरै बहस हुन थालेका कारण आफूले विधेयकमा ध्यानै दिन नसकेको भन्दै रोष्टममा बिषयान्तर भइन् । विधेयकको बिषय छाडेर प्रदेशको नाम र राजधानी केन्द्रित कुरा गर्न थालेपछि सभामुख भण्डारीले उनलाई ‘रुलिङ’ गर्न बाध्य भए ।
‘राजधानी र नामको बिषयमा धेरैतिबाट बहस भएका कारण विधेयकमा ध्यान दिन सकिएन, चाँडो गरेर नाम र राजधानी घोषणा गरौं’ सांसद थापाले यति भन्नेपछि सभामुख भण्डारीले ‘बिषयमा ध्यान दिनुहोस्’ भन्दै रुलिङ गरेका थिए ।
विधेयकमाथिको छलफलमा किन राजधानी र नामको कुरा ल्याउनु भयो भन्ने प्रश्नमा संखुवासभाकी सांसद थापाले ‘सवै दलभित्र छलफल भएको र जनतामा पनि सवैभन्दा धेरै चासो भएका कारण तरंग आएको’ जवाफ दिइन् ।
‘मिडियाभरी आएको छ, सत्तापक्ष र प्रतिपक्षको संसदीय दलभित्र छलफल भइसकेको छ, जतापनि राजधानी र नामको बिषयमै कुरा छ’ उनले भनिन्– ‘हामी त्यही बिषयमा निर्णय गर्ने सांसद हौं, हाम्रो प्राथमिकता नै त्यही हो, निर्णय गर्ने जिम्मेवारी भएकोले हामीलाई हतार लाग्नु स्वभाविक हो ।’ उनले नाम र राजधानीका बिषयमा छिटो गरी निर्णयमा पुग्नुपर्ने भएकोले विधेयकमाथिको छलफल भएपनि आफूले कुरो उठाएको बताइन् ।
प्रदेशसभाको शून्य समय विशेषगरी आफ्नो निर्वाचन क्षेत्र र प्रदेशभरीका सार्वजनिक चासोका बिषयमा सरकारलाई ध्यानाकर्षण गराउने महत्वपूर्ण थलो हो । तर प्रदेशसभाका सांसदहरु यसरी एकोहोरिए कि उनीहरुलाई सवैभन्दा महत्वपूर्ण बिषय नै प्रदेश राजधानी र नामाकरण भएको छ ।
आइतबारको प्रदेशसभाको बैठकमा शून्य समयमा बोल्दै प्रतिपक्षी दल नेपाली कांग्रेसका प्रदेश सांसद मोहम्मद ताहिर मियाँले जहाँसुकै भएपनि छिटो गरी प्रदेशको राजधानी टुंगो लगाउनु पर्ने बताए ।
‘जहाँ होस् ठिकै छ, फलानो ठाउँ भन्दैनौं तर छिटो होस्’ उनले भने– ‘मन्त्रालयहरु एकै ठाउँमा होस्, जनताको लागि सजिलो हुनुपर्छ ।’ शून्य समयमा लागि छुट्याइएको तीन मिनेटको समयभित्र सांसद मिया“ले प्रदेश राजधानीको बिषयमा मात्रै बोले । उनले राजधानीको बिषय चाँडो टुंग्याउन सरकारको ध्यानाकर्षण गराए ।
कांग्रेसकै सांसद शान्ता पौडेलले पनि शून्य समयमा राजधानीलाई प्रवेश गराइन् । उनले जिल्ला जिल्लामा प्रदेश राजधानीको चर्चा भइरहेको भन्दै प्रदेश सरकारका मन्त्रालयहरु एकैठाउँमा हुनुपर्ने बताइन् । सरकारले प्रदेशका मन्त्रालयसहित मुख्य संरचनालाई विभिन्न जिल्लामा विकेन्द्रीत गर्ने कुरा बाहिर आएपछि उनले एकैठाउँमा राख्नु पर्ने तर्क गरिन् ।
चाडबाडका बेलामा उपभोक्ताहरु नापतौलमा ढगिन सक्ने भएकोले त्यसको अनुगमन गर्न सरकारसँग माग गरिन् ।यो समाचार आजको उद्घोष दैनिकमा छापिएको छ ।
