७ साउन, विराटनगर ।
प्रदेश १ को प्रदेश प्रहरी कार्यालयमा कार्यरत एक प्रहरी कर्मचारीमा कोरोना संक्रमण देखिएको छ । ज्वरो आएपछि परीक्षणका लागि नमुना पठाइएकामा मंगलबार उनमा कोरोना संक्रमण पुष्टि भएको प्रदेश १ का प्रहरी प्रमुख डीआईजी ईश्वरबाबु कार्कीले जानकारी दिए ।
उनलाई कोशी अस्पतालको आइसोलेसनमा राखिएको छ । डीआईजी कार्कीका अनुसार उनको संक्रमणको स्रोत अझै पत्ता लागेको छैन । डिआईजी कार्कीले कार्यालय बन्द गरेर डिस्इन्फेक्ट गर्न सुरु गरिएको र कन्ट्याक ट्रेसिङ पनि सुरु गरिएको बताएका छन् ।
समूहमा सेवा प्रवाह गर्ने प्रहरी भित्र कोरोनाको संक्रमण देखिनुलाई ठूला जोखिम र चुनौतीको रुपमा लिइएको छ । सरकारले चारमहिना लामो लकडाउन अन्त्य गरेको छ । तर यसको संक्रमण थप क्षेत्रमा समूहमा फैलिँदै गएको छ ।
