१७ चैत , एजेन्सी ।
विश्वकप लिग–२ को आगामी सिरिजका लागि नेपाल क्रिकेट संघ (क्यान)ले ४८ खेलाडीलाई प्रारम्भिक चरणका लागि छनोट गरेको छ। आगामी जुनमा स्कटल्याण्डमा हुने त्रिकोणात्मक सिरिजका लागि प्रारम्भिक छनोट गरिएको हो ।
नेपाल क्रिकेट संघ (क्यान)ले आइतबार टोलीको प्रारम्भिक छनोट गरिएको जनाएको छ । क्यानका अनुसार छनोट भएका ४८ खेलाडीलाई नेपाल निलो, नेपाल रातो, नेपाल हरियो र नेपाल पहेँलो गरी ४ समूहमा विभाजन गरी तयारी खेलहरु संचालन गरिने छ ।
आगामी जुनमा नेपालले स्कटल्याण्डमा घरेलु टोली र नेदरल्याण्ड्ससँग लिग टु’को चौथो सिरिज खेल्ने छ । नवनियुक्त प्रमुख प्रशिक्षक स्टुअर्ट लको प्रत्यक्ष निगरानीमा तयारी खेलहरू सञ्चालन गरिने क्यानले जनाएको छ ।
छनोटका खेलहरु आगामी साता हुने हङकङ सिरिज पश्चात हुनेछ । शनिबार सकिएको प्रधानमन्त्री कप राष्ट्रिय एक दिवसीय प्रतियोगितामा गरेको प्रर्दशनका आधारमा धेरै खेलाडीहरु छनोट गरिएको हो ।
प्रारम्भिक चरणमा छानिएका खेलाडीहरुमा रोहितकुमार पौडेल, दीपेन्द्रसिंह ऐरी, सन्दीप लामिछाने, सोमपाल कामी, आसिफ शेख, कुशल भुर्तेल, गुल्सनकुमार झा, करण केसी रहेका छन् ।
यसैगरी ललित नारायण जोशी, अनिलकुमार साह, सन्दीप जोरा, आरिफ शेख, भीम सार्की, कुशल मल्ल, सागर ढकाल, लोकेश बम, शाहब आलम, आकाश चन्द छन् । यस्तै विवेककुमार यादव, सूर्य तामाङ, रिजन ढकाल, देव खनाल, बसिर अहमद, प्रतिस जिसी, अविनाश बोहरा, मयन यादव, अर्जुन घर्ती, हेमन्त धामी समेटिएका छन् ।
दीपेशप्रसाद कँडेल, रुपेशकुमार सिंह, अर्जुन कुमाल, शुभ कंसाकार, किरण ठगुन्ना, ईशान पाण्डे, शेर मल्ल, प्रज्वल थापा, तृतराज दास, दीपेन्द्र रावत, नन्दन यादवका साथै सुजन थपलिया, दिलीप नाथ, आकाश त्रिपाठी, विशाल पटेल, शाकिब हक, विनोद भण्डारी, पवन सर्राफ, राशिद खान, अर्जुन साउद रहेका छन् ।
नवनियुक्त प्रमुख प्रशिक्षक स्टुअर्ट लको यो पहिलो परीक्षा हुनेछ । नेपाल क्रिकेट संघ (क्यान)ले नेपाली राष्ट्रिय पुरुष टोलीको मुख्य प्रशिक्षकको जिम्मेवारी अष्ट्रेलियन प्रशिक्षक स्टुअर्ट ललाई दिएको छ । प्रशिक्षक स्टुअर्टले अब आगामी २ वर्ष नेपाली टोली सम्हाल्नेछन् ।
नेपाली टोलीको मुख्य प्रशिक्षक बन्न ७० जनाले इच्छा जाहेर गरेका थिए । तर, त्यसमा सर्टलिष्ट र अन्तर्वार्ता हुँदै स्टुअर्ट छानिए । ५६ वर्षीय स्टुअर्ट अष्ट्रेलियाका पूर्वक्रिकेटर हुन् । उनले सन् १९९४ देखि १९९९ सम्म अष्ट्रेलियाबाट अन्तर्राष्ट्रिय क्रिकेट खेलेका थिए ।
उनले अष्ट्रेलियाका लागि एउटा टेष्ट र ५४ ओडिआई खेलेका थिए । उनले थुप्रै घरेलु लिग खेलेका छन् । स्टुअर्टले सन् २०११ बाट श्रीलंकाको सहायक प्रशिक्षकको रुपमा प्रशिक्षणको यात्रा सुरु गरेका थिए ।
हालसम्म उनले श्रीलंका, वेस्टइन्डिज, बंगलादेश, अफगानिस्तान र अमेरिकामा प्रशिक्षकको रूपमा काम गरिसकेका छन् । उनकै प्रशिक्षणमा अमेरिकाले सन् २०२४ को टी(२० विश्वकपमा उत्कृष्ट प्रदर्शन गर्दै सुपर–८ यात्रा तय गरेको थियो ।
पाकिस्तानलाई सुपर ओभरमा पराजित गरेको थियो । सन् २०२४ को अक्टोबरमा भएको आइसीसी विश्वकप लिग(२ अन्तर्गत स्कटल्याण्डसँग १० विकेटको हार बेहोरेपछी अमेरिकी क्रिकेट बोर्डले स्टुअर्टलाई मुख्य प्रशिक्षकको पदबाट हटाएको थियो ।
त्यसपछि उनी नेपाली टोलीको प्रशिक्षक बन्न आइपुगेका हुन् । अब नेपाली टोली सम्हालेका स्टुअर्टलाई आईसीसी विश्वकप लिग–२ मा प्रदर्शन सुधार्ने जिम्मेवारी रहनेछ । लिग–२ मा १२ खेल खेलेको नेपाल पछाडीबाट दोस्रो स्थानमा छ । यस्तै विभिन्न सिरिज र टी–२० विश्वकपमा छनोट हुने चुनौती नवनियुक्त प्रशिक्षक स्टुअर्टमा हुनेछ ।
