१३ भदौ , काठमाण्डौ।
सप्तरीमा जंगली बँदेल मारेको आरोपमा पूर्वडिआइजी, बहालवाला सईसहित १० जना पक्राउ परेका छन् । सप्तरीको हनुमाननगर कंकालिनी नगरपालिका– १ भारदह योगीनायाँ कोशी पलार क्षेत्रमा जंगली बँदेल मारेको आरोपमा बुधबार राति २ बजे उनीहरु पक्राउ परेका हुन् ।
पक्राउ पर्नेमा सुनसरीको इटहरी उपमहानगरपालिका –२ घर भएका नेपाल प्रहरीका पूर्वडिआईजी ज्ञानविक्रम शाह ,विराटनगर ३ घर भएका नेपाल प्रहरीका बहालवाला सई सञ्जय न्यौपाने र हनुमाननगर कंकालिनी नगरपालिका ८ घर भएका पूर्व उपसभामुख गंगाप्रसाद यादवका छोरा आकाश बहरखेर यादव रहेको सप्तरी प्रहरीका प्रवक्ता डिएसपी ढुण्डीराज न्यौपानेले जानकारी दिएका छन् ।
यस्तै ,इटहरी २ का प्रदीप लिम्बु, राजविराज ७ का रविन दास, तिरहुत–२ का लक्ष्मण मण्डल, हनुमाननगर कंकालिनी २ का जर्नादन राउतलाई समेत पक्राउ गरिएको छ। यसैगरी हनुमाननगर कंकालनी नगरपालिका–५ का ओमशंकर प्रसैला, वडा नं १ का लक्ष्मण मण्डल, वडा नम्बर ३ का शंकर खिडहरी यादवलाई पनि पक्राउ गरिएको छ।
डिएसपी न्यौपानेका अनुसार प्रहरीले उनीहरुको साथवाट २२ क्यालीबरको राइफल एउटा, म्यागजिन दुई, १५ राउण्ड गोली, तीनवटा वाइनाकुलर, ट्राइपोर्ट एक, फलामको हथौडा एक, खुर्पा एक पनि बरामद गरेको छ ।
यस्तै मारिएको बँदेल लोड गरिएको को २ त ६९ नम्बरको ट्रयाक्टर र प्र ३ – ०१– ०२२ च ६८५५ नम्बरको स्कारपियो समेत नियन्त्रणमा लिएको छ । घटनाबारे अनुसन्धान भइरहेको डिएसपी न्यौपाने बताए। मन्त्रिपरिषद्ले ७ मंसिर ०८० मा हानिकारक वन्यजन्तु भनेर बँदेललाई घोषणा गरेको थियो ।
जसअनुसार बाली खान आएको वेला खेतबारीमै मार्न सकिने, तर मारेको बँदेल जनप्रतिनिधिको रोहवरमा गाड्न वा मूल्य तोकी मासु बिक्री–वितरण गर्नसमेत सकिने व्यवस्था छ । बुधबार राती पक्राउ परेकाहरुले भने खेतबारीमा बाली खान आएका बेला बँदेल मारेको बताएका छन् ।
जंगली बँदेलले किसानको खेतबारीमा आई बालीनाली वा धनजनको हानि–नोक्सानी पु¥याएमा किसान एक्लै वा सामूहिक रूपमा त्यस्तो बँदेललाई धपाउन, लखेट्न वा मार्न पनि पाउनेछन् ।
जंगली बँदेललाई पक्रिएको खण्डमा सम्बन्धित राष्ट्रिय निकुञ्ज कार्यालय, वन्यजन्तु आरक्षण, सिकार आरक्ष कार्यालय, संरक्षण क्षेत्रको कार्यालय, डिभिजन कार्यालयमा बुझाउनुपर्ने र उक्त सूचना स्थानीय वडा कार्यालयमा समेत दिनुपर्ने राजपत्रमा उल्लेख गरिएको छ ।
बँदेललाई धपाउने वा लखेट्ने क्रममा मृत्यु भएमा सम्बन्धित वडाको एकजना प्रतिनिधिसहित कम्तीमा पाँचजना स्थानीय व्यक्तिको रोहबरमा मुचुल्का खडागरी गाड्न वा तौलका आधारमा मूल्य तोकी उक्त रकम राजस्वमा दाखिला गर्न सकिने उल्लेख छ ।
यसबारे वन्यजन्तु आरक्ष कार्यालय, सिकार आरक्ष, डिभिजन वन कार्यालयमा जानकारी दिनुपर्ने उल्लेख छ । मारिएको बँदेल वन्यजस्तुलगायत कार्यालयले प्रत्येक महिना नेपाल सरकारको वन तथा वातावरण मन्त्रालय, राष्ट्रिय निकुञ्ज तथा वन्यजन्तु संरक्षण विभाग तथा सम्बन्धित प्रदेश सरकारको सम्बन्धित मन्त्रालयमा बुझाउनुपर्ने उल्लेख छ ।
तर, राजपत्रमा उल्लेख भएअनुसार राष्ट्रिय निकुञ्ज, वन्यजन्तु आरक्ष, सिकार, संरक्षण क्षेत्र वा राष्ट्रिय वन क्षेत्रमा जंगली बँदेललाई धपाउन, लखेट्न, पक्रन वा मार्न पाइनेछैन् ।
