१९ असार, विराटनगर ।
मारुती सिमेन्ट उद्योगका सञ्चालक नन्दकिशोर राठीसहित ६ जनाविरूद्ध पक्राउ पुर्जी जारी भएको छ । मारूती सिमेन्टका प्रमुख सञ्चालक नन्दकिशोर, प्रबन्ध निर्देशक उनका छोरा अनुज, उद्योगका प्रतिनिधि लक्ष्मीप्रसाद सिवाकोटी, डिलर सञ्जय साह, सिमेन्ट बिक्री गर्ने नरेश साह र अजयकुमार साहविरूद्ध पक्राउ पुर्जी जारी भएको हो ।
ठगी एवं आपराधिक विश्वासघात गरेको कसुरमा नन्दकिशोर राठीसहित ६ जनालाई पक्राउ गर्न जिल्ला प्रहरी कार्यालय सप्तरीले पक्राउ अनुमति लिएको बताएको छ । सप्तरीको राजविराज नगरपालिका–४ का दिवाकर साहले गत चैतमा घर बनाउँदा मारूती सिमेन्ट प्रयोग गरेको तर ढलान नै भत्किएको भन्दै उनीहरूविरूद्ध जाहेरी दिएका थिए ।
उनले उजुरी दिएपछि समेन्टका व्यापार प्रबन्धक पक्राउ परेका छन् । साहले दिएको जाहेरीका आधारमा जिल्ला अदालत सप्तरीबाट पक्राउ पुर्जी जारी भई मारुती सिमेन्टका व्यापार प्रबन्धक ज्योति जोशीलाई प्रहरीले विराटनगरबाट पक्राउ गरेको हो । पक्राउ परेका जोशीलाई अदालतले अनुशन्धानका लागि ५ दिनको समय दिएको छ ।
उनको बयान समेत सकिएको जिल्ला प्रहरी कार्यालय सप्तरीले जानकारी दिएको छ । सप्तरीका प्रहरी प्रमुख एसपी नरेन्द्रकुमार कार्कीले राजविराजका साहले घर निर्माण गर्दै गर्दा घरको ढलान र भर्याङ सिमेन्टको गुणस्तर काम भएको भनेर उजुरी दिएपछि व्यापार प्रवन्धक पक्राउ परेको बताए ।
उनले भने, ‘मारुती सिमेन्ट उद्योगका ६ जना विरुद्ध पक्राउ पुर्जी जारी भएको थियो । त्यस मध्ये व्यापार प्रवन्धक ज्योति जोशी पक्राउ परेका छन् । अन्य ५ जना फरार रहेका छन् । उद्योगका सञ्चालक नन्दकिशोर राठी र उनका छोरा तथा सिमेन्ट उद्योगका प्रबन्ध निर्देशक अनुज राठीसहित ५ जना फरार रहेका छन् । हामीले खोजि गरिरहेका छौं ।’
यता मारुती सिमेन्ट सञ्चालक पक्षले भने जसले मुद्दा हाल्यो उसैले लामो समयदेखि ‘बार्गेनिङ’ गर्दै आएको दाबी गरेको छ । संचारकर्मी समेत रहेका पीडित भनिएका दिवाकरले भने सिमेन्टविरुद्ध जाहेरी दिएपछि आफुलाई विभिन्न पक्षबाट दबाब र प्रभाव आइरहेको बताएका छन् ।
