१७ साउन ,विराटनगर ।
आफ्नी प्रेमिकालाई विदेश जान नदिनका लागि सुनसरीबाट बालिकाको अपरहण भएको छ । सुनसरीको दुहवीबाट अपहरित ६ वर्षीया बालिकालाई प्रहरीले विराटनगरबाट उद्धार गरेको छ । अपहरण गरेको आरोपमा प्रहरीले तीन जनालाई पक्राउ गरेको छ ।
घटनामा संलग्न भएको आरोपमा विराटनगर महानगरपालिका–६ का ५० वर्षीय सञ्जय पासवान, विराटनगर–१० मा सञ्जयका आफन्त पर्ने ५० वर्षीय कलानन्द पासवान र ४० वर्षीया सरिता पासवानलाई पक्राउ गरिएको सुनसरी प्रहरीले जनाएको छ ।
प्रहरीका अनुसार सञ्जयले बालिकाको अपहरण गरी कलानन्द र सरिताको डेरामा ल्याएर राखेका थिए । सञ्जयले फिरौतीका लागि नभएर बालिकाको ठूलीआमालाई विदेश जान रोक्नका लागि अपहरण गरेको प्रहरीले जनाएको छ । बालिकाको ठूलीआमा वैदेशिक रोजगारीमा जानका लागि काठमाडौं गएकी छन् ।
मंगलबार अपहरणपछि बालिकाको मामालाई फोन गरेर सञ्जयले दिदी ९बालिकाको ठूलीआमा०लाई फिर्ता बोलाउन भनेका थिए । फिर्ता नबोलाए बालिका अरुलाई नै दिने भन्दै धम्की दिएका थिए । प्रहरीका अनुसार बालिकाको ठूलीआमा र अपहरणमा संलग्न सञ्जयबीच प्रेम सम्बन्ध छ ।
यसैले उनी प्रेमिकालाई विदेश जान रोक्ने योजनामा थिए । तर प्रेमिका विदेश जानका लागि काठमाडौं गएपछि सञ्जयले फिर्ता बोलाउन उनको बहिनीको छोरीलाई घरबाटै अपहरण गरेको देखिएको प्रहरीले बताएको छ । बालिका मंगलबार दिउँसो ३ बजेतिर हराएकी थिइन् ।
बालिका हराएको जानकारी आएपछि इलाका प्रहरी कार्यालय दुहवीले खोजी गर्ने क्रममा बुधबार बिहान विराटनगर–१० बाट उद्दार गरेको थियो । पक्राउ परेकाविरुद्ध अपहरण तथा शरीर बन्धक मुद्दा चलाउने सुनसरी प्रहरीले बताएको छ ।
यता बिरामी भएपछि उपचारका लागि कोशी अस्पताल भर्ना गरिएका कैदी फरार भएका छन् । जिल्ला कारागार मोरङमा कैद सजाय भुक्तान गरिरहेका २४ वर्षीय आर्यन मोहमद अहमद खान भनिने मोहमद अहमद कोशी अस्पतालबाट फरार भएका हुन् ।
मोरङ प्रहरी प्रमुख नवराज कार्कीका अनुशार पेट दुख्ने समस्याका कारण कोशीमा उपचारका लागि ल्याइएका कैदी विहान सवा ५ बजे शौचालय जाने क्रममा फरार भएका हुन् । शाौचालय जाने क्रममा अस्पताल निगरानीमा खटाइएका प्रहरीलाई धकेलेर लडाउँदै उनी फरार भएको एसपी कार्कीले बताएका छन् ।
विराटनगर महानगरपालिका–८ घर भएका अहमद जबरजस्ती करणी मुद्दामा दोषी ठहर भएका कैदी हुन् । भारततर्फ भाग्नसक्ने सम्भावनालाई मध्यनजर गरेर नेपाल–भारत सीमा क्षेत्रमा निगरानी गरी व्यापक खोजी जारी राखिएको उनले बताएका छन् ।
जबरजस्ती करणी मुद्दामा अहमदलाई जिल्ला अदालत मोरङले २०७९ फागुन २९ गते १२ वर्ष कैद र ५ लाख जरिवानाको फैसला गरेको थियो । अदालतको फैसला अनुसार उनको कैद भुक्तान २०९१ साल फागुन ३ मात्रै हुने छ ।
