८ भदौ, विराटनगर ।
भारत सरकारले आफ्ना एक केन्द्रीय मन्त्रीलाई बस दुर्घटनाका घाइतेहरूलाई भेट्न काठमाडौं पठाउने भएको छ ।
पृथ्वीराजमार्गअन्तर्गत तनहुँको आँबुखैरेनी गाउँपालिका-२ ऐनापहरास्थित मर्स्याङ्दी नदीमा शुक्रबार बिहान भारतीय पर्यटक सवार बस दुर्घटना भएको थियो ।
४४ जना सवार युपी ५३ एफटी ७६२३ नम्बरको बस मर्स्याङ्दी नदीमा खस्दा २७ जनाको मृत्यु भएको थियो । जसमा १९ जना घाइते भएकामध्ये १६ जनाको महराजगन्जस्थित टिचिङ अस्पतालमा उपचार भइरहेको छ ।
सामान्य घाइते तीन जनालाई काठमाडौंस्थित भारतीय दूतावासको समन्वयमा गोरखा निवास गेस्ट हाउसमा राखिएको छ ।
बस दुर्घटनामा घाइते भएकाहरूलाई भेट्न र मृतक शवहरू लिएर जान भारत सरकारकी युवा तथा खेलकुद राज्यमन्त्री रक्षा खडसे नेपाल आउने भएकी हुन् ।
प्रधानमन्त्री नरेन्द्र मोदीको निर्देशनमा खडसे आज बिहान काठमाडौं आउँदै छिन् । उनका साथमा महाराष्ट्र जलगांवका एकजना विधायक पनि आउने जानकारी गराइएको छ ।
