४ वैशाख, बाँके ।
कोहलपुर नगरपालिका–१३ स्थित बाँके राष्ट्रिय निकुन्ज सडक खण्डमा भएको सवारी दुर्घटनामा परि मृत्यु भएका पाँच जनाको सनाखत भएको छ ।
टिपर र बस ठोक्किँदा मृत्यु हुने ५ मध्ये ४ जनाको शुक्रबारै सनाखत भएको थियो । सनाखत हुन बाँकी थप एक जना महिलाको पनि शनिबार सनाखत भएको छ ।
सिराह सुखीपुर गाउँपालिका–३ घर भएकी ३२ वर्षिया अम्बिका कान्तिको दुर्घटनामा मृत्यु भएको कोहलपुर इलाका प्रहरी कार्यालयका डिएसपी रविन्द्र खनालले बताए ।
उनका अनुसार शिक्षाका लागि खाद्यान्न कार्यक्रम सुर्खेतमा कार्यरत उनी घर जाँदै थिइन् । उनीसँग डेढ वर्षीया छोरी पनि थिइन् । छोरी सुरक्षित रुपमा कोहलपुर मेडिकल कलेजमा रहेको डिएसपी खनालले सुनाए ।
कोहलपुरमा शुक्रबार बस र टिप्पर ठोक्किँदा ५ जनाको मृत्यु भएको थियो । सुर्खेतदेखि धरान जाँदै गरेको मे १ख ३३४७ नम्बरको बस पूर्वबाट पश्चिम आउँदै गरेको टिपरको ठक्करले दुर्घटना भएको थियो ।
बसमा ४२ जना सवार थिए । जसमध्ये ५ जनाको मृत्यु भएको थियो । अन्यको अस्पतालमा उपचार भइरहेको छ ।