१४ असार,एजेन्सी ।
रुसमा जनरल सर्गेई सुरोभिकिनलाई पक्राउ गरिएपछि नयाँ तरंग उत्पनन भएको छ । जनरल आर्मागेडोन भनेर चिनिने सुरोभिकिनको गिरफ्तारीमा रुसको रक्षा मन्त्रालयबाट अहिलेसम्म कुनै वक्तव्य आएको छैन। तर मस्को टाइम्सले मन्त्रालयको नजिकका दुई स्रोतलाई उद्धृत गर्दै यसको पुष्टि गरेको छ।
वाग्नरका प्रमुख येभगेनी प्रिगोजिनले राष्ट्रपति भ्लादिमिर पुटिन विरुद्ध विद्रोह गरेपछि सुरोविकिन शनिबारदेखि बेपत्ता भएको रिपोर्ट गरिएको छ। गत वर्ष युक्रेन युद्धमा पुटिनले जनरल सुरोविकिनलाई सेनाको नयाँ कमाण्डर बनाएका थिए। त्यसबेला यो नियुक्तिलाई पुटिनको नयाँ रणनीतिका रूपमा व्याख्या गरिएको थियो।
“जनरल सुरोविकिनको अवस्था राम्रो छैन,“ मस्को टाइम्सलाई स्रोतले भनेकोे छ, यो भन्दा बढि म केहि भन्न सक्दिन । जबकि अर्को स्रोतले प्रिगोजिनको सन्दर्भमा उनलाई पक्राउ गरिएको बताएको छ। बुधवार सैन्य ब्लगर भ्लादिमिर रोमानोभले सुरोविकिनलाई प्रिगोजिनको विद्रोहको भोलिपल्ट हिरासतमा राखिएको बताएका थिए ।
रोमानोभ युक्रेनमा युद्धको एक ठूलो समर्थक हुन् । उनले दावी गरेका छन् कि सुरोविकिनलाई अहिले मस्कोको लेफोर्टोभो हिरासत केन्द्रमा राखिएको छ। मस्को रेडियो स्टेशनका मुख्य सम्पादक एलेक्सी भेनेडिक्टोभले पनि एक टेलिग्राममा सुरोविकिन तीन दिनदेखि आफ्नो परिवारसँग सम्पर्कमा नरहेको बताएका छन् । उनका गार्डहरूले पनि कुनै प्रतिक्रिया दिएका छैनन्।
अमेरिकी अखबार द न्यूयोर्क टाइम्सले अज्ञात अमेरिकी अधिकारीहरूलाई उद्धृत गर्दै, सुरोभिकिनलाई रुसको सैन्य नेतृत्व विरुद्ध विद्रोह उक्साउने प्रिगोजिनको योजनाको पूर्व जानकारी रहेको बताएको थियो । यद्यपि, क्रेमलिनका प्रवक्ता दिमित्री पेस्कोभले बुधबार उक्त रिपोर्टलाई ’अड्काली’ र ’गसिप’ भन्दै खारेज गरेका छन्।
अखबारमा भनिएको छ कि पुटिनले रुसी सेनाका शीर्ष अधिकारीहरूको सरुवाको लागि प्रिगोजिनको मागलाई स्वीकार गरेनन्। वाग्नर विद्रोहले राष्ट्रपति पुटिनका लागि दशकौंको सबैभन्दा ठूलो चुनौती र रूसको सामना गर्ने सबैभन्दा गम्भीर सुरक्षा संकट खडा गरेको छ।
बेलारुसका राष्ट्रपति अलेक्ज्याण्डर लुकाशेन्कोको मध्यस्थतापछि यो मामिला अहिलेलाई केही शान्त भएको छ । सुरोविकिनले अक्टोबर २०२२ र जनवरी २०२३ सम्म तीन महिना युक्रेनमा रुसी सेनाको कमाण्ड गरेका थिए। यसपछि पुटिनले यस युद्धको जिम्मेवारी चीफ जनरल स्टाफ ख्वालेरी गेरासिमोभलाई दिएका थिए ।
