२४ असार , काठमाण्डौ ।
अविरल वर्षाका कारण आएको बाढीपहिरोलगायत विपदमा परी हालसम्म ७० जनाले ज्यान गुमाएका छन् । केन्द्रीय प्रहरी प्रवक्ता एवं प्रहरी नायब महानिरीक्षक दानबहादुर कार्कीले जेठ २८ देखि आज बिहानसम्म बाढीपहिरोमा परेर ७० जनाको मृत्यु, ८६ जना घाइते र पाँच जना बेपत्ता भएको जानकारी दिए ।
घाइतेको स्थानीय अस्पतालमा उपचार भइरहेको प्रहरीले जनाएको छ । उक्त अवधिमा बाढीपहिराका नौ सय ६६ घटना घटेका छन् । त्यसमा ८६ घरमा क्षति पुगेको र तीन सय ३५ पशु चौपायको मृत्यु भएको छ । उक्त अवधिमा चार हजार सात सय ९० प्रहरी बाढीपहिरामा परिचालन गरिएको र ९ करोड ५६ लाख ७४ हजार दुई सय ५० मूल्य बराबरको क्षति पुगेको प्रहरी प्रधान कार्यालयले जनाएको छ ।
भारी वर्षाका कारण आज पनि देशका विभिन्न क्षेत्रमा जनजीवन प्रभावित भएको छ । यसबीच बाढी, पहिरो र डुबानले राष्ट्रिय राजमार्गसहित ग्रामीण सडकमा यातायात प्रभावित हुँदा सहरी भेगमा तरकारीको भाउ आकासिएको पाइएको छ । कालीमाटी फलफूल तथा तरकारी बजार विकास समितिको आंकडा अनुसार थोक मूल्यमै पछिल्लो एक सातामा उच्च मूल्य वृद्धि भएको छ ।
यसले उपभोक्ता मूल्य झनै महँगो बन्न गएको छ । समितिका अनुसार सबैजसो तरकारी र फलफूलको मूल्य बढेको छ । सडक विभागका अनसार यस वर्ष देशभर २१५ स्थानमा राष्ट्रिय राजमार्ग प्रभावित बनेको थियो । जसमध्ये अझै विभिन्न २० स्थानमा सडक सञ्चालनमा आइसकेको छैन । १०८ स्थानमा एकतर्फी मात्र सडक खुलेको छ ।
