१० चैत, बारा । भारतमा कोरोना संक्रमण दर फेरि बढ्दो क्रममा छ । यससँगै नेपालसँग सीमा जोडिएको प्रदेश २ का बारा र पर्सामा सोमबार एकै दिन १० जना संक्रमित थपिएका छन् ।
प्रदेश २ मा केही महिनायता कोरोना संक्रमण दर शून्यमा झरेकोमा सोमबार भने एकैसाथ १० जना संक्रमित थपिँदा त्रास बढेको छ ।
जनकपुरस्थित प्रदेश २ स्वास्थ्य निर्देशनालयले जारी गरेको बुलेटिनमा नारायणी अस्पताल वीरगञ्जमा २४ घण्टाभित्र ५० जनामा गरिएको स्वाब परीक्षणमा १० जना संक्रमित भेटिएको उल्लेख गरिएको छ । पर्साका एक संक्रमित दुई साताअघि भारतको मुम्बईबाट फर्किएका थिए ।
संक्रमण दर उच्च भएका भारतीय क्षेत्रमा रहेका नेपाली स्वदेश फर्किन थालेका छन् । चिकित्सकले नाकामा स्वास्थ्य सर्तकता अपनाउन सुझाइरहे पनि नेपाल छिर्नेलाई सीमाका सुरक्षाकर्मीले सामान्य सोधपुछ मात्र गरिरहेका छन् । स्वास्थ्य सचेतनाका काम गर्न सकेका छैनन् ।
नेपाल प्रवेशका मूल नाकाहरुमा सतर्कताबिना मानिसको खुलेआम आउजाउ भइरहेको छ जसले गर्दा कुनै पनि बेला महामारीको दोस्रो लहर नेपाल भित्रिन सक्ने विज्ञहरुको विश्लेषण गरिरहेका छन् ।
