२५ पौष, एजेन्सी ।
म्यानचेस्टर सिटीले एफए कपको तेस्रो राउन्डमा प्रिमियर लिग प्रतिद्धन्द्धी चेल्सीमाथि सानदार जित निकाल्दै चौथो चरणमा प्रवेश गरेको छ । गएराति भएको खेलमा चेल्सीलाई ४–० गोल अन्तरले हराउँदै सिटी विजयी भएको हो । सिटीका लागि रियाद महरेजले दुई गोल गरे भने जुलियन अल्भारेज र फिल फोडेनले एक÷एक गोल गरे ।
यस्तै, राति नै भएका अरु खेलमा डर्बीले बर्नलीलाई र स्टोक सिटीले हार्टलीपोललाई समान ३–० गोल अन्तरले हराए । त्यसैगरी, नर्विच ब्लाक बर्नसित १–० गोल अन्तरले पराजित भयो भने एस्टोन भिल्ला स्टेभेन्जसँग २–१ ले पराजित भयो । कार्डिफ र लिड्सले भने २–२ गोल गर्दै बराबरी गरे । यस्तै, ब्रिस्टोल र स्वान्सी सिटीले एक÷एक गोलको बराबरी खेले ।
उता स्पेनिस ला लिगामा एट्लेटिको म्याड्रिडमाथि झिनो जित निकाल्दै शीर्षस्थानमा रहेको क्याटलान क्लब बार्सिलोनाले ३ अंकको स्पष्ट अग्रता लिन सफल भएको छ । बार्सिलोनाले घरेलु टोली एट्लेटिको म्याड्रिडलाई १–० ले पराजित गर्दै शीर्षस्थानमा रियल म्याड्रिडलाई ३ अंकले पछि पारेको हो ।
मेट्रोपोलिटानोमा आइतबार राति भएको खेलमा बार्सिलोनाको जितमा पहिलो हाफमा औसमाने डेम्वेलेले गरेको गोल नै निर्णायक बन्यो । उनले २२औं मिनेटमा पाब्लो गाभीको पासमा गोल गर्न सफल भएका थिए । रोमाञ्चक र प्रतिस्पर्धात्मक बनेको खेलका दुवै टोलीले गोलका केही अवसर सिर्जना गरेपनि त्यसपछि थप गोल निस्कन नसक्दा डेम्वेलेको पहिलो हाफको गोल नै बार्सिलोनाको जितमा पर्याप्त बन्यो ।
यस जितसँगै शीर्षस्थानमा रहेको बार्सिलोनाको १६ खेलबाट ४१ अंक पुगेको छ । दोस्रो स्थानमा रहेको रियल म्याड्रिडको ३८ अंक छ । पराजित एट्लेटिको म्याड्रिड २७ अंक जोडेर पाँचौं स्थानमा छ । यस्तै इटालियन सिरी ‘ए’ मा दुई गोलको अग्रता जोगाउन नसक्दा एसी मिलान बराबरीमा रोकिएको छ । मिलानले घरेलु मैदानमा रोमासँग २–२ गोलको बराबरीमा रोकिएको हो ।
मिलानका पिएरे कालुलु र टोम्मासो पोवेगाले गोल गर्दा रोमाका रोजर इवानेज र ट्याम्मी अब्राहमले बराबरी गोल फर्काए । यस बराबरीसँगै मिलान १७ खेलबाट ३७ अंक जोडेर तेस्रो स्थानमा यथावत रहेको छ । रोमा ३१ अंक जोडेर छैटौं स्थानमा छ । यस्तै सिरी ‘ए’ कै अर्काे खेलमा सालेरनिटाना र टोरिनोले १–१, लाजियो र इम्पोलीले २–२ र स्पेजिया र लिसले गोलरहित बराबरी खेल्दै अंक बाँडेका छन् ।
