१७ साउन ,काठमाण्डौ ।
आफ्नो प्रधानमन्त्रीको चौथो कार्यकालका लागि सबैभन्दा ठूलो दल नेपाली कांग्रेससँग सत्ता हस्तान्तरणको लिखित सहमति गरी प्रधानमन्त्री बनेका नेकपा एमालेका अध्यक्ष केपी शर्मा ओलीले अब पार्टीको कुनै पनि बैठक आफ्नो सरकारी निवास बालुवाटारमा नगर्ने भएका वाटारमा नगर्ने भएका छन् ।
आफू जनताले दिएका सुझाव अनुशार चल्ने भन्दै उनले आगामी दिनमा पनि जनताले दिएको सुझाव अनुशार नै अघि बढ्ने वचन दिएका छन् । जनताबाट आएको सुझाव मनन् गर्दै सरकारी निवासमा पार्टी बैठक नराख्ने निर्णय गरेको उनले बताएका छन् ।
त्यसैले आजको सचिवालय बैठक पार्टी केन्द्रीय कार्यालय च्यासलमा डुबानका कारण राख्न सम्भव नभएकाले होटेलमा बस्ने पनि उनले स्पष्ट पारेका छन् । “मेरो स्वास्थ्य अवस्थाले साथ दिएसम्म सरकारी निवास बालुवाटारमा पार्टीको बैठक नराख्ने जानकारी गराउँछु,” एमाले अध्यक्ष समेत रहेका प्रधानमन्त्री ओली सामाजिक सञ्जाल फेसबुकमा लेखेका छन्, “आज हाम्रो पार्टीको सचिवालय बैठक छ ।
मनोहरा खोलामा आएको बाढीको डुबानले बैठक पार्टी कार्यालयमा बस्न नसक्ने भएका कारण यसपटक बैठक अन्यत्र राखिएको छ ।” यसरी नै मलाई सुझाव दिँदै जानुहोला । धन्यवाद ! उनले जनताको सुझाव अनुशार नै यो निर्णय गरेको जनाउ दिएका छन् । एमाले सचिवालय बैठक आज होटेल बसेरामा बस्दै छ ।
यसअघिका प्राय प्रधानमन्त्रीहरुले पार्टीका हरेक बैठकहरु वालुवाटारमा नै गर्दै आएका थिए । यो सूचीमा यसअघि ३ पटक प्रधानमन्त्री बनिसकेका ओली समेत रहेका छन् । पूर्व प्रधानमन्त्री पुष्पकमल दाहाल प्रचण्ड, शेरबहादुर देउवाले पनि प्रधानमन्त्री बनेपछि पार्टीका बैठक बालुवाटारमा नै गर्ने गरेका थिए ।
सरकारी निवासमा पार्टी बैठक हुँदा सार्वजनिक सम्पत्तिको संरक्षक हनुपर्ने देशको सर्वोच्च कार्यकारीको सरकारी निवास नै राज्यको ढुकुटी व्यक्ति वा पार्टीको स्वार्थमा दोहन गर्ने मुहान हुनेगरेको भन्दै यसअघि पनि आलोचना हुने गरेको थियो । प्रधानमन्त्री निवासमा पार्टीका बैठक बस्दा सरकारी स्रोत, साधन र सुविधाको दोहन हुने टिप्पणी हुने गरेको छ ।
कतिले सरकारी निवासमा बैठक बोलाएर सरकारी बजेटको दुरूपयोग गरेको टिप्पणी गर्ने गरेका छन् भने कतिले सरकारी निवासमा पार्टीको बैठक बोलाउनु स्वाभाविक भएको बताउने गरेका छन्। पार्टीको बैठक सरकारी निवासमा गर्दा सरकारी निवासलाई पार्टी कार्यालय बनाएको टिप्पणी पनि हुने गरेको छ।
