४ माघ, काठमाडौं ।
बालुवाटारमा सत्तारूढ राजनीतिक समन्वय समितिको बैठक जारी छ।
छलफलमा सत्तारूढ गठबन्धनका शीर्ष नेताहरू सहभागी छन्। सत्तागठबन्धनका ५ दलबाट राजनीतिक समन्वय समितिमा ११ जना सदस्य छन्। आजको बैठकमा प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड, जसपा संघीय परिषद अध्यक्ष बाबुराम भट्टराईलगायत शीर्ष नेताहरू बैठकमा सहभागी छन्।
बैठकमा स्थानीय तहको चुनावको मिति घोषणा गर्नेबारे छलफल भइरहेको बताइएको छ । निर्वाचन आयोगले माघ दोस्रो साताभित्र स्थानीय चुनावको मिति तय गर्न सरकारलाई आग्रह गरेको छ ।
आयोगले प्रस्ताव गरेको मितिमा निर्वाचन हुनुपर्नेमा प्रमुख विपक्षी नेकपा एमालेले पनि दबाब दिएपछि यसबारे निर्णय लिन सरकार सञ्चालन समन्वय समितिको बैठक बसेको हो ।
गत शुक्रबार सर्वदलीय बैठक बोलाएर आयोगले माघ दोस्रो साताभित्र निर्वाचनको मिति घोषणा गर्न सत्तारुढ दललाई आग्रह गरेको थियो । छलफलमा प्रमुख प्रतिपक्षी एमालेले आयोगले प्रस्ताव गरेको १४ र २२ वैशाखमै निर्वाचन हुनुपर्ने माग गरेको थियो ।
समन्वय समिति संयोजक कांग्रेस नेता रामचन्द्र पौडेल छन्। दुई महिनाको अन्तरमा संयोजक परिवर्तन गर्ने सहमतिअनुसार समिति बनेको थियो। आजको बैठकमा संघीय संसद सुचारू गर्ने र माघ १२ मा हुने राष्ट्रिय सभा निर्वाचनमा सत्तागठबन्धनका रणनीतिबारे पनि छलफल हुने स्रोतले जनाएको छ।
प्रमुख प्रतिपक्षी नेकपा एमालेले लामो समयदेखि संघीय संसद अवरूद्ध गर्दै आएको छ।
