१२ असार, काठमाण्डौ ।
बालुवाटारको ललिता निवासको सरकारी जग्गा हिनामिना प्रकरणमा जोडिएका भाटभटेनी सुपर मार्केटका सञ्चालक मीनबहादुर गुरुङ पक्राउ परेका छन्। प्रहरीको केन्द्रीय अनुसन्धान ब्यूरो (सीआईबी)ले गुरुङलाई पक्राउ गरेको हो । सीआईबी स्रोतका अनुशार गुरुङलाई नियन्त्रणमा लिए थप अनुसन्धान भईरहेको छ।
ललिता निवासको जग्गा हिनामिना प्रकरणमा अख्तियार दुरुपयोग अनुसन्धान आयोगले यसअघि नै विशेष अदालतमा भ्रष्टाचार मुद्दा दायर गरेको थियो। जुन अहिले विशेष अदालतमा विचाराधीन रहेको छ। ललिता निवासको २९९ रोपनी ३ आना सरकारी जग्गा हिनामिना प्रकरणमा गुरुण आरोपित रहेका छन् ।
यस प्रकरणमा गुरुङले शोभाकान्त ढकाल, रामप्रसाद सुवेदी तथा मालपोत कार्यालयका हुपेन्द्रमणि केसी र टीका घिमिरेसँगको मिलोमतो सबैभन्दा धेरै जग्गा खरिद गरेको पाइएको थियो । प्रहरीको केन्द्रीय अनुसन्धान ब्यूरोले अहिले सोही प्रकरणमा दोस्रो चरणको अनुसन्धान गरिरहेको छ।
दोस्रो चरणको अनुसन्धानका क्रममा सरकारी कागजात कीर्ते लगायत कसुरमा गुरुङको समेत संलग्नता देखिएपछि उनलाई पक्राउ गरिएको सीआईबी स्रोतले जनाएको छ। यसअघि दायर भएको मुद्दामा समेत प्रतिवादी रहेका गुरुङ विशेष अदालतको आदेशअनुसार २ करोड रुपैयाँ धरौटी बुझाएर रिहा भएका थिए।
काठमाडौंको बालुवाटारस्थित् ११३ रोपनी सरकारी जग्गा विभिन्न व्यक्तिको नाममा दर्ता गर्ने काममा संलग्न भएको आरोपको मुद्दामा गुरुङसँग विशेष अदालतले २ करोड रूपैयाँ धरौटी माग गरेपछि उनी बैंक ग्यारेन्टीमा धरौटी बुझाएर रिहा भएका थिए । गुरुङ परिवारका नाममा विशेष अदालतले २०७६ फागुन २३ गते अदालत उपस्थित हुनका लागि १५ दिने म्याद जारी गरेको थियो सोअनुसार झण्डै ११ महिना ढिलो गरी २०७७ मा उनी विशेषमा उपस्थित भएका थिए।
अख्तियारले दुरुपयोग अनुसन्धान आयोगले गुरुङसँग ५० करोड ४७ लाख रुपैयाँको बिगो मागदाबी गर्दै विशेष अदालतमा मुद्दा दायर गरेको थियो । अख्तियार अनुसन्धान आयोगले विशेष अदालतमा दायर गरेको आरोपपत्रअनुसार बालुवाटारको सरकारी जग्गाको गैरकानुनी किनबेचमा व्यवसायी गुरुङसँगै उनका छोरा कल्याण गुरुङ‚ छोरी तथा सहोदर भाइ र बुहारीसमेतको संलग्नता रहेको पाइएको थियो।
गुरुङका छोरा कल्याण, छोरी कामना, भाइ पहलमान र भाइबुहारी सरला गुरुङले सरकारी जग्गा कीर्ते गरी बेचबिखन गरेको अख्तियारले दायर गरेको आरोपपत्रमा उल्लेख गरिएको छ। ललिता निवास प्रकरणमा गुरुङ सहित अन्य सात÷आठ जना पक्राउ गर्ने तयारी भएको प्रहरी अधिकारीहरुले बताएका छन । सीआईबी प्रमुख एआईजी किरण बज्राचार्यले अपरेशन चलिरहेको र ललितानिवास प्रकरणमा मुछिएका अन्य व्यक्तिलाई पनि खोजिरहेको बताएकी छिन् ।
