२८ वैशाख, काठमाण्डौ ।
प्रहरीले उच्च महत्वका साथ छानविन गरिरहेको नक्कली शरणार्थी प्रकरणमा उच्च नेतृत्व पक्राउ पर्नु तथा अन्य उच्च नेतृत्व समेत मुछिएको खबरहरु बाहिरिरहदा नेपाल प्रहरीका अवकाशप्राप्त वरिष्ठ उपरीक्षक (एसएसपी) लव विष्टले नेपाली कांग्रेसकी नेतृ तथा प्रतिनिधि सभा सदस्य आरजु राणालाई लक्षित गर्दै गुनासो गरेका छन् ।
उनले बुढानिलकण्ठ बस्ने भाउजूको चाकडी गर्न मनले नमान्दा बढुवाबाट वञ्चित हुनुपरेको बताएका छन् । उनले बिहीबार सामाजिक सञ्जाल फेसबुकमा स्टाटस लेख्दै बुढानीलकण्ठ बस्ने भाउजुलाई चाकडी गर्न मनले नमान्दा बढुवा हुनबाट वञ्चित हुनुपरेको गुनासो गरेका छन् ।
उनले आफू प्रहरी सेवामा रहँदा विभिन्न राजनैतिक आक्रमण भएकोसमेत खुलाएका छन् । ‘बुढानीलकण्ठ बस्ने भाउजुलाई चाकडी गर्न मनले नमान्दा बढुवा हुनबाट वञ्चित भई अवधि नै नपुगी प्रहरी सेवा बाट हटनु परेको हो ,’ उनले लेखेका छन्,’ बि सं २०७३ मा ‘सिनियारिटी’को हिसाबमा १ नम्बरमा रही कार्य सम्पादनमा अब्बल हुँदाहुँदै पनि नोटको बिटोसहित बिमलेन्द्र निधिमार्फत बुढानीलकण्ठ बस्ने भाउजुलाई बुझाउन सकिन ।
‘नक्कली शरणार्थी प्रकरणमा समेत आरजुको नाम जोडिएको छ । आरजु र यही प्रकरणमा पक्राउ परेका पूर्व गृहमन्त्री बालकृष्ण खाँणकी पत्नी मन्जु खाँणको भएको भन्दै एक अडिओ बाहिरिएको छ । तर सो अडिओ आफूहरुको नभएको दुवैले खण्डन गरिसकेका छन् ।
यसको अनुशन्धानका लागि आरजुले त प्रहरीमा उजुरी समेत दिएकी छन् । उनले आफुमाथिको आरोप र आशंका निराधार रहेको भन्दै संसदमा समेत दोषीलाई कडा कारबाही गर्नुपर्ने बताएकी छन् ।
नक्कली शरणाथी प्रकरणमा अहिलेसम्म १२ जना पक्राउ परिसकेका छन् भने पूर्व उर्जामन्त्री टोपबहादुर रायामाझी र पूर्वगृहमन्त्री रामबहादुर थापाका छोरा भने फरार रहेका छन् ।प्रहरी संगठन भित्र बढुवा र सरुवामा लागि शक्तिकेन्द्र धाउनु पर्ने गुनासाहरु बेला बेला सार्वजनिक हुदै आएका छन् ।
यसैले सरकार र प्रहरी नेतृत्व परिवर्तन हुना साथै उनीहरुले पनि सरुवा र बढुवाका लागि शक्ति केन्द्र धाउनु नपर्ने प्रतिवद्धता जनाउने गरेका छन् । यसअघि पूर्व डिआईजी रमेश खरेलले समेत बढुवा हुनका लागि ब्रिफकेस बुझाउनु पर्ने अभिब्यक्ति दिएका थिए । यसले तत्कालीन राजनीतिक नेतृत्वमा हलचल पैदा भएको थियो ।
