२९ मंसिर , काठमाण्डौ ।
अष्ट्रेलियाको सिड्नीस्थित बोन्डाइ बीच (समुद्री तट) मा भएको गोलीकाण्डमा एक १० वर्षीया बालिकासहित कम्तीमा १५ जनाको मृत्यु पुष्टि भएको छ । यस घटनालाई अष्ट्रेलियामा करिब तीन दशकयताकै सबैभन्दा भयावह सामूहिक गोलीकाण्डका रूपमा लिइएको छ ।
आइतबार स्थानीय समयअनुसार साँझ ६ः४७ बजे बोन्डाइ बीच नजिकैको पार्कमा गोली चलेको थियो । प्रहरीका अनुसार मृतकमध्ये एक जना बन्दुकधारी पनि छन् । अर्को संदिग्ध आक्रमणकारी गम्भीर अवस्थामा रहेको बताइएको छ ।
गोलीकाण्डमा दुई जना प्रहरी अधिकारीसहित दर्जनौँ व्यक्ति घाइते भएका छन् । हाल करिब ४० जना अस्पतालमा उपचाररत छन् । मृतकहरूको उमेर १० वर्षदेखि ८७ वर्षसम्म रहेको प्रहरीले बताएको छ ।
प्रहरीले घटनालाई आतङ्कवादी हमलाको रूपमा लिएर अनुसन्धान गरिरहेको छ । प्रहरी कमिश्नरले आक्रमणमा संलग्न दुई बन्दुकधारी ५० वर्षीय बाबु र उनका २४ वर्षीय छोरा रहेको जानकारी दिएका छन् ।
प्रहरीको गोली लागेर वृद्ध बन्दुकधारीको घटनास्थलमै मृत्यु भएको छ भने २४ वर्षीय छोराको अवस्था चिन्ताजनक रहेको छ । गोली चलेको सूचना पाएपछि न्यु साउथ वेल्स प्रहरीले तत्काल अपरेसन सुरु थालेको थियो ।
न्यु साउथ वेल्स प्रहरीले सामाजिक सञ्जाल ‘एक्स’मार्फत बोन्डाइ बीच क्षेत्रमा ठूलो स्तरको प्रहरी अपरेसन जारी रहेको जनाएको छ । प्रहरीले घटनास्थल वरपर नजान र सबै निर्देशनको पालना गर्न सर्वसाधारणलाई आग्रह गरेको छ ।
घटनापछि सार्वजनिक भएका भिडियो फुटेजमा पुलबाट दुई जना बन्दुकधारीले पार्कतर्फ लगातार गोली प्रहार गरेको देखिन्छ । अष्ट्रेलियन ब्रोडकास्टिङ कर्पोरेसन (एबीसी) का अनुसार प्रहरीले ‘एक्टिभ सुटर’को सूचनामा आधारित भएर कारबाही गरिरहेको छ ।
स्थानीय सञ्चारमाध्यम सेभेन न्यूजका अनुसार गोलीको आवाजपछि सयौँ मानिस समुद्र तटबाट भाग्दै गरेको दृश्य देखिएको थियो । यसैबीच, घाइतेहरूको उपचारका लागि सिड्नीका अस्पतालमा रगतको अभाव देखिएपछि लाइफ ब्लड अष्ट्रेलियाले ‘ओ’ नेगेटिभ रगतको आपतकालीन माग गरेको छ ।
सिड्नीका बासिन्दालाई रक्तदान गर्न आग्रह गरिएको छ । अत्यधिक चापका कारण लाइफ ब्लडको वेबसाइटमा अस्थायी प्राविधिक समस्या आएको जनाइएको छ । घटनाको अनुसन्धान जारी रहेको र मृतक तथा घाइतेको विवरण अद्यावधिक हुने प्रहरीले जनाएको छ ।
हनुका पर्वको सुरुवातको उपलक्ष्यमा एक कार्यक्रम चलिरहेको बेला यो आक्रमण भएको थियो । प्रहरीका अनुसार ५० वर्षीय बन्दुकधारीसँग वैध हतियार इजाजतपत्र थियो र उनका नाममा छवटा हतियार दर्ता थिए ।
आक्रमणस्थल बोन्डाइ बीचमा छवटा हतियार फेला परेको प्रहरीले जनाएको छ । घटनास्थलमा ’दुईवटा सक्रिय सुधारिएका विस्फोटक उपकरणहरू’ पनि भेटिएका थिए, जसलाई प्रहरीले निष्क्रिय पारिसकेको छ ।
यसैबीच यो गोलीकाण्डका एक बन्दुकधारीसँग जुधेर उसको हतियार खोसेको भिडियोमा देखिएका ‘हिरो’ नागरिकको पहिचान खुलेको छ । उनको नाम ४३ वर्षीय अहमद अल अहमद रहेको पुष्टि भएको छ ।
बीबीसीले प्रमाणित गरेको भिडियोमा अहमद अल अहमद बन्दुकधारीतर्फ दौडेर गएको, उनको हतियार खोसेको र त्यसै हतियारलाई बन्दुकधारीतर्फ सोझ्याएपछि उनी पछाडि हट्न बाध्य भएको देखिन्छ ।
फलफूल पसलका मालिक तथा दुई सन्तानका पिता अहमद अल अहमद हाल अस्पतालमा छन् । उनका परिवारले सेभेन न्युज अस्ट्रेलियालाई दिएको जानकारी अनुसार उनको पाखुरा र हातमा गोली लागेको घाउका लागि शल्यक्रिया भएको छ ।
अहमदका भतिज मुस्तफाले ७ न्युज अस्ट्रेलियालाई भने, ‘उनी अहिले पनि अस्पतालमा छन् र हामीलाई ठ्याक्कै के भइरहेको छ भन्ने थाहा छैन, डाक्टरले उनी ठिक छन् भनेका छन्। उनी ठिक होउन् भन्ने हामी कामना गर्छौं, उनी शतप्रतिशत हिरो हुन्। उनको पाखुरा र हातमा गोली लागेको छ र शल्यक्रिया गर्नुप¥यो।’
अहमद अल अहमदले गरेको हस्तक्षेपको फुटेज अनलाइनमा व्यापक रूपमा सेयर भइरहेको छ । भिडियोमा एक बन्दुकधारी एउटा सानो पैदल पुल नजिकै ताडको रुख पछाडि उभिएर हतियार चलाउँदै गरेको देखिन्छ ।
पार्किङ गरिएको कार पछाडि लुकिरहेका अहमद अल अहमद आक्रमणकारीमाथि झम्टिन्छन्। उनले आक्रमणकारीबाट बन्दुक खोस्न सफल हुन्छन् र उसलाई भुइँमा धकेलेर बन्दुक उसैतर्फ सोझ्याउँछन्। त्यसपछि आक्रमणकारी पुलतर्फ पछि हट्न थाल्छ ।
त्यसपछि अहमदले हतियार तल झारेर आफ्नो एउटा हात माथि उठाएको देखिन्छ, जसबाट उनी आफू आक्रमणकारी नभएको सन्देश प्रहरीलाई दिन खोजेको देखिन्छ । पछि सोही आक्रमणकारी पुलमा अर्को हतियार लिएर फेरि गोली चलाउँदै गरेको देखिन्छ।
अर्का बन्दुकधारीले पनि पुलबाट गोली चलाउन जारी राखेको देखिन्छ। उनीहरूले कसलाई वा केलाई निशाना बनाउँदै थिए भन्ने स्पष्ट छैन । आइतबार ढिलो भएको पत्रकार सम्मेलनमा न्यू साउथ वेल्सका प्रिमियर क्रिस मिन्सले अहमदको बहादुरीको प्रशंसा गरेका थिए, तर त्यतिबेला उनको नाम खुलाइएको थिएन ।
अस्ट्रेलियाका प्रधानमन्त्री एन्थोनी अल्बानीजले भने, ‘हामीले आज अस्ट्रेलियालीहरूलाई अरूलाई मद्दत गर्न खतरातिर दौडेको देख्यौँ। यी अस्ट्रेलियालीहरू नायक हुन्, र उनीहरूको बहादुरीले ज्यान जोगाएको छ।’
यसबीच प्रहरी अधिकारीहरूले रातभरि पश्चिमी सिड्नीका क्याम्प्सी र बोनीरिग उपनगरका दुई सम्पत्तिमा छापा मारेका छन् । सिड्नीको यहुदी समुदायलाई थप सुरक्षा र सहयोग प्रदान गर्न ३२८ अधिकारी परिचालन गरिएको प्रहरीले बताएको छ ।
प्रधानमन्त्री एन्थोनी अल्बानीजले यस आक्रमणलाई ’दुष्टताको कार्य’ र ’सचेतरुपमा यहुदी समुदायलाई लक्षित गरिएको’ बताएका छन् ।
