१७ असोज, एजेन्सी ।
विश्वको चाथौ ठूलो प्रजातान्त्रिक देश ब्राजिलमा नयाँ राष्ट्रपति चयनका लागि दोस्रो चरणको मतदान हुने भएको छ । आइतबार भएको चुनावमा कुनै पनि उम्मेदवारले ५० प्रतिशत मत प्राप्त नगरेपछि दोस्रो चरणमा मतदान हुने भएको ब्राजिलका निर्वाचन अधिकारीलाई उद्धृत गर्दै समाचार संस्था रोयटर्सले जनाएको छ ।
वर्तमान राष्ट्रपति जायर बोल्सोनारोले अपेक्षा गरिए भन्दा राम्रो मत ल्याएपछि पहिलो चरणमै जित हाँसिल गर्ने वामपन्थी नेता लुइज इनासिओ लुला डा सिल्भा लक्ष्य पूरा भएन । ९५ प्रतिशत मत गणना हुँदा पूर्वराष्ट्रपति लुलाले ४७.६ प्रतिशत मतसहित अग्रता लिएका छन् । यस्तै वर्तमान राष्ट्रपति बोल्सोनारोले ४३.९ प्रतिशत मत पाएका छन् ।
दोस्रो चरणको मतदान अक्टोबर ३० मा हुनेछ । अधिकांश मत सर्वेक्षणहरुले लुलालाई बोल्सोनारो भन्दा १० देखि १५ प्रतिशत मतले अघि देखाएका थिए । तर निकै कडा प्रतिस्पर्धाले ध्रुविकृत ब्राजिलियन राजनीतिमा स्थिरता पर देखिएको हो । यो चुनावले ब्राजिलको राजनीतिक मार्ग दक्षिणपन्थबाट वामपन्थ तर्फ जान सक्ने सम्भावना थियो ।
दक्षिणपन्थी नेता बोल्सोनारो दोस्रो कार्यकालका लागि प्रतिस्पर्धा गरिरहेका छन् । मतदानका लागि योग्य रहेका ब्राजिलका १५६ मिलियन नागरिकलाई मत खसाल्नु अनिवार्य छ । मतदानपछि अर्का उम्मेदवार लुलाले आफ्नो चाहना ‘देशलाई पुनः सामान्य अवस्थामा फर्काउनु’ रहेको बताएका थिए ।
विद्युतीय मतदान प्रणालीमाथि प्रश्न गर्दै आएका बोल्सोनारोले भने ‘पारदर्शी’ चुनाव हुनु पर्ने बताउँदै आएका छन् । आफू पराजित भएमा नतिजा स्वीकार गर्ने या नगर्ने भन्ने सम्बन्धमा पत्रकारले सोधेको प्रश्नको बोल्सोनारोले स्पष्ट जवाफ नदिएको समाचार संस्था एएफपीले जनाएको थियो ।
बोल्सोनारोले रियो दि जेनेरियोमा राष्ट्रिय झण्डाको पहेँलो र हरियो रङको टिसर्ट लगाएर मतदान गरेका थिए । यो अभियानले ल्याटिन अमेरिकी मुलुकलाई गहिरो विभाजित बनाएको छ । बोल्सोनारोले मतदान प्रणालीमाथि गरेको आक्रमणले गत वर्ष अमेरिकी संसद भवनमा भएको दङ्गाको ब्राजिली संस्करणको भय बढाएको छ ।
अमेरिकी पूर्व राष्ट्रपति डोनाल्ड ट्रम्पले आफ्नो चुनावी हार स्वीकार गर्न अस्वीकार गरेका थिए । ट्रम्पले बोल्सोनारोलाई अन्तिम क्षणमा समर्थन गर्दै उनलाई ‘शालीन नेता’ र ‘विश्वको कुनै पनि देशको महान राष्ट्रपतिमध्ये एक’ राष्ट्रपतिकारूपमा चित्रण गरेका थिए । ६७ वर्षका बोल्सोनारो सेनाका पूर्व क्याप्टेन हुन् ।
उनले ब्राजिलको विद्युतीय मतदान प्रणालीमाथि शंका व्यक्त गर्दै आएका छन्, तर त्यसका आधार भने दिने गरेका छैनन् । यस्तै ७६ वर्षका लुला फलाम खानीका पूर्वकामदार हुन् । उनी सन् २००३ देखि २०१० सम्म ब्राजिलको राष्ट्रपति थिए । उनलाई सन् २०१८ मा जेल चलान गरिएको थियो र तर पछि उनीमाथिको आरोप हटाइएको थियो ।
जेलमा भएका कारण उनी सन् २०१८ मा चुनाव लड्न पाएका थिएनन् । भ्रष्टाचारको अभियोगमा जेल परेको लुलाका लागि यो निर्वाचन परिणाम राजनीतिमा उल्लेखनीय पुरागमन हो । सर्वेक्षणहरुलाई गलत सावित गर्दै लुलासँगको मतान्तरलाई कम गर्नु बोल्सोनारोका लागि उत्साहित गर्ने विषय हो । दुवै उम्मेदवारहरु एक अर्कोको ठीकविपरीत धारणा राख्छन् ।
