६ फागुन ,एजेन्सी ।
रोबर्ट लेवान्डोस्कीको पेनाल्टी गोलसँगै बार्सिलोना स्पेनिस ला लिगाको शीर्ष स्थानमा फर्किएको छ । सोमबार राति सम्पन्न खेलमा बार्सिलोनाले रायो भालेकानोलाई १–० ले पराजित गरेको हो । यो जितपछि बार्सिलोनाको ५१ अंक पुगेको छ ।
रियल मड्रिडको पनि समान अंक छ । एट्लेटिको मड्रिड ५० अंकका साथ तेस्रो स्थानमा छ । बार्सिलोनाले यो मौका रियल र एट्लेटिकोको कमजोर प्रदर्शनको फाइदा उठाउँदै प्राप्त गरेको हो । शनिबार रियलले ओसासुना र एट्लेटिकोले सेल्टा भिगोसँग १–१ को बराबरी खेलेको थियो ।
२७औं मिनेटमा पठे सिसले मार्टिनेजलाई पेनाल्टी बक्सभित्र लडाएपछि भिडियो रेभ्युमार्फत बार्सिलोनालाई पेनाल्टी दिइएको थियो । त्यसपछि लेवान्डोस्कीले उत्कृष्ट फिनिसिङ गर्दै बल जाली चुमाए। बार्सिलोनाका लामिन यामालले राम्रो अवसर पाएका थिए ।
तर, रायोका गोलरक्षक अगस्टो बटाल्लाले उत्कृष्ट बचाउ गरे । त्यस्तै रायोका जोर्जे डे फ्रुटोसले गोल गरेका थिए तर अफसाइडका कारण मान्यता पाउन सकेन । रायोका लागि डे फ्रुटोस खेलभरि खतरनाक देखिए । तर, दोस्रो हाफमा बार्सिलोनाले खेल आफ्नो नियन्त्रणमा लियो ।
यो जितसँगै बार्सिलोनाले अपराजित यात्रा १२ खेलमा पु¥याएको छ । यस हारसँगै रायोको डिसेम्बर ७ देखि कायम रहेको ९ खेलको अपराजित यात्रा समाप्त भएको छ । उता ब्राजिल फर्किएपछि नेयमारले पहिलो गोल गरेका छन् ।
सोमबार भएको खेलमा उनले पेनाल्टीमार्फत गोल गर्दै सान्तोसलाई साओ पाउलोस्थित आगा सान्तामाथि ३–१ को जित दिलाए । ३३ वर्षीय स्टार खेलाडीले खेलको १४औं मिनेटमा पेनाल्टीमार्फत गोल गर्दै आफ्नो पुनरागमनलाई सहज बनाउने प्रयास गरे ।
सान्तोसका लागि थासियानोले २६औं मिनेटमा तथा गुइल्हेर्मेले ७०औं मिनेटमा नेयमारकै एसिस्टमा गोल गर्दै जित सुनिश्चित गरे । नेयमारले अहिलेसम्म सान्तोसका लागि कुनै पनि खेलमा पूरा ९० मिनेट खेलेका छैनन् । पहिलो तीन खेलमा उनी सामान्य देखिएका थिए ।
तर, सोमबारको प्रदर्शनमा उनले आफूमा सुधार देखाए । उनी घुँडाको चोटपछि पुनः फिट हुने प्रयासमा छन् । नेयमार गत अक्टोबरमा करिब एक वर्षको ब्रेकपछि फुटबलमा फर्किएका थिए । गत महिनामात्रै उनले साउदी क्लब अल–हिलालसँग आपसी सहमतिमा सम्झौता अन्त्य गरेको पुष्टि गरेका थिए ।
अल–हिलालमा उनले चोटका कारण कठिन समय बिताए, जहाँ सात खेल मात्र खेल्दै एक गोल गर्न सफल भए । नेयमारले सान्तोससँग ६ महिनाको सम्झौता गरेका छन् । त्यसपछि सम्झौता विस्तार गर्ने सम्भावना पनि छ । उनले पहिलो पटक सान्तोसबाट २००९ देखि २०१३ को बीचमा खेलेका थिए, जहाँ २२५ खेलमा १३८ गोल गरे ।
त्यसपछि उनी २०१७ मा बार्सिलोनाबाट पेरिस सेन्ट जर्मेन (पिएसजी) मा २२२ मिलियन युरो (त्यतिबेला २६२ मिलियन डलर) मा गएका थिए, जुन त्यो समयसम्मकै कीर्तिमानी ट्रान्सफर थियो । २०२३ मा उनी ९० मिलियन युरो (९४ मिलियन डलर) मा अल–हिलाल पुगेका थिए ।
