४ असार, काठमाडौं ।
भत्ता र व्यवस्थापनको माग राखेर राष्ट्रिय पुनर्निर्माण प्राधिकरणका प्राविधिकहरूले आन्दोलन थालेका छन् ।
सरकारले अतिरिक्त सेवा सुविधा नदिएको तथा आउँदो असार मसान्तपछि सम्झौता सकिने भएकाले आन्दोलन गर्नुपरेको प्राधिकरणको प्राविधिक राष्ट्रिय हकहित संरक्षण समितिले जनाएको छ ।
पुनर्निर्माण प्राधिकरणले पाँच वर्षे समयावधि सकिएकाले असार मसान्तपछि सम्झौता नवीकरण नगर्ने जनाएको छ । आफूहरूलाई विपद् जोखिम प्राधिकरणसहित अरू ठाउँमा व्यवस्थापनको बाटो खुला गर्नुपर्ने तथा सरकारले दिन्छु भनेको भत्ता दिनुपर्ने समितिका संयोजक अविनाश अमरले बताए । महामारीको यो बेला सम्झौता नवीकरण नभए झन्डै तीन हजार प्राविधिक बिचल्लीमा पर्ने उनले बताए ।
आउँदो असार १० गते सामूहिक राजीनामा दिने र ११ गते सिंहदरबार घेर्ने कार्यक्रम रहेको समेत संयोजक अविनाश अमरले बताए ।
प्राविधिकले पाउने भत्ताका लागि अर्थ मन्त्रालयमा प्रस्ताव लगेकाले समस्या नहुने तर तोकिएको समयावधि नै सकिएकाले करार सम्झौता नवीकरण हुन नसक्ने राष्ट्रिय पुनर्निर्माण प्राधिकरणले जनाएको छ ।