२७ कात्तिक, बाँके ।
भारतको सीमावर्ती बजार रुपैडिहाबाट भारतीय प्रहरीले एक जना नेपाली युवतीको उद्धार गरेको छ ।
कोहलपुर नगरपालिका वडा नं. ८ महादेवपुरकी २२ वर्षीय युवतीलाई भारत लैजाने क्रममा भारतीय सशस्त्र सीमा बल रुपैडिहा चौकीको चेक जाँच टोलीले युवतीसहित तस्करलाई पक्राउ गरेको हो ।
युवतीलाई सोधपुछ गर्ने क्रममा आफूलाई दिल्ली लगेर बिहे गर्ने आश्वासन दिएको बताएपछि मानव तस्करीको आशङ्कामा प्रहरीले युवतीसँगै रहेका व्यक्तिलाई नियन्त्रणमा लिएको बताइएको छ ।
प्रहरीका अनुसार तस्करले ललाइफकाइ दिल्ली लैजान लागेको र नाकामा प्रहरीले सोधेमा आफु श्रीमान्–श्रीमती भएको भन्नु भनेर ती तस्करले सिकाएको सोधपुछका क्रममा खुलेको थियो ।
भारतीय प्रहरीद्वारा उद्धार गरिएकी ती युवतीलाई शान्ति पुनर्स्थापना केन्द्र पठाएको छ भने मानव तस्कर लेब बहादुर घर्तीलाई नेपाल प्रहरीको जिम्मा लगाएको बताइएको छ ।
सीमामा तैनाथ नेपाल प्रहरीले मानव बेचबिखनमा पर्न सक्नेलाई नाकामै नियन्त्रणमा लिने गरेको छ भने नेपालबाट जोगिएर भारत छिरेका मानव तस्कर कार्यमा सक्रियहरूलाई भारतीय प्रहरीले समेत पक्राउ गर्ने गरेको छ ।
