२६ वैशाख, एजेन्सी ।
भारतमा ‘मोका’ नामको शक्तिशाली आँधी आउने चेतावनी जारी गरिएको छ ।
भारतीय मौसम विज्ञान विभागका अनुसार बंगालको खाडीमा बनेको चक्रवात निकै भीषण आँधीमा परिणत हुने र हावाको गति प्रतिघण्टा १३० किलोमिटरसम्म पुग्न सक्ने देखिएको छ ।
सोमबार दक्षिणपूर्वी बंगालको खाडी र नजिकैको दक्षिण अण्डमान सागरमा न्यून चापीय क्षेत्र बनेको छ ।
चक्रवात यही वैशाख २९ मा बंगलादेश र म्यानमारको तटतर्फ अघि बढ्ने अनुमान गरिएको छ ।
भारतीय सञ्चारमाध्यमका अनुसार पश्चिम बंगालमा मोका चक्रवातको प्रभावले यो आँधी तटीय क्षेत्रबाट बंगलादेशतर्फ कति टाढा पुग्छ भन्नेमा निर्भर गर्दछ ।
भारतीय मौसम विभागले पश्चिम बंगाल, ओडिसा र आन्ध्र प्रदेशका लागि पनि अलर्ट जारी गरेको छ ।
विभागले साना समुद्री जहाज र माछा मार्नेहरूलाई मंगलबारदेखि बाहिर ननिस्कन आग्रह गरेको छ । साथै मे १२ सम्म अण्डमान र निकोबार टापुहरू नजिकैको पर्यटन र ढुवानीलाई सीमित गर्न र नजिकबाट निगरानी राख्न भनिएको छ ।
यो शक्तिशाली आँधीलाई मध्यपूर्व एशियाको देश यमनले ‘मोका’ नाम दिएको छ ।
मोका यमनको एउटा सहर हो, जसलाई मोखा पनि भनिन्छ। यो शहर कफीको व्यापारका लागि परिचित छ। ‘मोका कफी’ पनि यसैको नामबाट राखिएको हो ।
एसिया र प्यासिफिकका लागि संयुक्त राष्ट्र संघको आर्थिक र सामाजिक आयोग (भ्क्ऋब्ए) प्यानलका १३ सदस्य राष्ट्रहरूले आँधीलाई नाम दिएका छन्।
जसमा भारत, बंगलादेश, म्यानमार, पाकिस्तान, माल्दिभ्स, ओमान, श्रीलंका, थाइल्याण्ड, इरान, कतार, साउदी अरब, संयुक्त अरब इमिरेट्स र यमन पर्छन्।
यस क्षेत्रमा उत्पत्ति भएका आँधीहरूको समूह नामकरणमा संलग्न देशहरूको नाम वर्णमाला अनुसार राखिएको छ।
बी बाट पहिले बंगलादेश आएपछि पहिल उसले नामका लागि सुझाव दिनेछ भने त्यसपछि भारत र इरान अनि बाँकी देशहरुले आँधीको नाम सुझाउने छन् ।
सोमबार पश्चिम बंगालकी मुख्यमन्त्री ममता बनर्जीले विज्ञप्ति जारी गर्दै चक्रवातबाट डराउनुपर्ने आवश्यकता नरहेको बताएकी छन् ।
अप्ठ्यारो परेमा तटीय क्षेत्रका जनतालाई उद्धार गरिने उनले उल्लेख गरेकी छन् । भारतमा आउने आँधीको असर नेपालमा भने अहिलेसम्म पर्ने सम्भावना नदेखिएको मौसम पूर्वानुमान महाशाखाका मौसमविद्ले बताएका छन् ।
