७ चैत, विराटनगर ।
प्रदेश एक सरकारले छिमेकी मुलुक भारतसँग जोडिएका सबै नाका तत्काल बन्द गर्न केन्द्र सरकारसँग आग्रह गर्ने निर्णय गरेको छ । मुख्यमन्त्री शेरधन राईको संयोजकत्वमा शुक्रबार बसेको कोरोना रोकथाम तथा नियन्त्रण समितिको बैठकले भारतसँग जोडिएको नाका बन्द गर्न केन्द्र सरकारसँग आग्रह गर्ने निर्णय गरेको हो ।
बैठकमा सहभागी सामाजिक विकासमन्त्री जीवन घिमिरेले कोरोना भाइरसको जोखिमलाई ध्यानमा राख्दै मानिसहरूको आवतजावत रोक्न नाका बन्द गर्न जरूरी रहेको बताए ।यसैबीच प्रदेश १ मा काँकडभिट्टा, पशुपतिनगर, भद्रपुर र विराटनगरसँग जोडिएको नाका सञ्चालनमा छन् । प्रदेश १ का प्रवक्ता तथा आन्तरिक मामिला तथा कानुन मन्त्री हिक्मत कुमार कार्कीसहितको टोलीले विराटनगर रानी–जोगबनीमा रहेको हेल्थ डेस्क र नाकाको अनुगमन समेत गरेको छ । सो क्रममा मन्त्री कार्कीले प्रदेश १ संग जोडिएका सवै साना सिमा नाकालाई बन्द गरिने र जोगबनी र काकरभिटट नाकालाई व्यवस्थित ढंगबाट सञ्चालन गरिने गरी संघीय सरकारसंग आग्रह गर्ने बताएका छन् । उनले आज भोलिनै छलफल गरेर कार्यान्वयन गर्ने पनि बताए ।
यसैगरी सामाजिक विकास मन्त्री जीवन घिमिरेले विराटनगरमा एक साताभित्र ५० शैयाको आपतकालीन अस्पताल पनि बनाउने निर्णय गरेको जानकारी दिए । विराटनगरस्थित नेशनल ट्रेडिङको भवनमा कोशी अस्पतालको संयोजनमा १० वटा भेन्टिलेटरसहितको अस्पताल स्थापना गरिने मन्त्री घिमिरेले बताए । उनले प्रदेशभरिका अस्पतालबाट रिफर भएर आएका केशहरुको मात्रै आपतकालिन अस्पतालमा उपचार हुने समेत बताए ।
कोरोना जोखिमलाई लिएर प्रदेश सभा बैठक पनि अनिश्चितकालको लागि स्थगित भएको छ । शुक्रबार सभामुख प्रदिप कुमार भण्डारीले अर्को सूचना जारी नभएसम्मको लागि बैठक स्थगित भएको जानकारी गराएका थिए ।
