२४ असोज, काठमाण्डौ ।
अछाम– १ मा नेकपा एमालेका तर्फबाट सर्वसम्मत उमेद्वार सिफारिस भएका पूर्वउपाध्यक्ष भीम रावलको टिकट खोसेर एमालेले झपट बोहरालाई अवसर दिएपछि एमाले सुदूरमा पहिरो जाने क्रम बढ्दै गएको छ । बोहरा माओवादी केन्द्रबाट एमाले आएका हुन् ।
यता एकल नाम सिफारिस हुँदासमेत रावललाई टिकट नदिएपछि एमाले कार्यकर्ताहरु रुष्ट भएका छन् । बोहरा मनोनयन दर्ता गरेर फर्किने क्रममा रावल समर्थक कार्यकर्ताहरुले कालो झण्डासहित नाराबाजी गरेका थिए । रावलनिकट कार्यकर्ता अछाममा एमाले अध्यक्ष केपी शर्मा ओलीविरुद्ध नाराबाजीमै उत्रिएका थिए ।
एमालेको पार्टी कार्यालयसमेत आइतबार बन्द रहेको थियो । बोहरा उम्मेदवारी दर्ता गर्न होटलबाट निर्वाचन अधिकृतको कार्यालय पुगेका थिए । भीम रावललाई टिकट नदिएपछि नेकपा एमाले अछामका नेताहरुले सामूहिक राजीनामा समेत दिएका छन् । अछाम क्षेत्र नं १ बाट रावलको एकल नाम सिफारिस हुँदासमेत टिकट नदिएको भन्दै अहिलेसम्म १२२ जनाले राजीनामा दिएका छन् ।
४१ जना जिल्ला कमिटी सदस्य र ८१ जना नगरकमिटीका पदाधिकारी सदस्यहरुले पदबाट राजीनामा दिएका हुन् । सुदूरपश्चिममा आसन्न प्रतिनिधि र प्रदेश सभा निर्वाचनमा एमालेबाट टिकट नपाएकाहरु कतै बागी उठेका छन् भने कतै राजीनामा दिएका छन् । उता डडेल्धुरामा पनि नेपाली कांग्रेस बीपीसँग एमालेले गरेको गठबन्धन टुटेको छ ।
डडेल्धुरामा नेकपा एमालेले प्रतिनिधि सभामा कांग्रेस बीपीका वरिष्ठ उपसभापति कर्णबहादुर मल्ललाई समर्थन गर्दै आफ्नो उम्मेदवार नउठाउने सहमति गरेको थियो । यो सहमतिविपरीत डडेल्धुरामा एमालेबाट प्रतिनिधि सभामा दुईजनाको उम्मेदवारी परेको छ । प्रतिनिधि सभातर्फ पूर्व राष्ट्रिय सभा सदस्य चक्र स्नेहीको उम्मेदवारी परेको छ ।
यस्तै, एमाले विभाजनमा नेकपा एकीकृत समाजवादीमा लागेर केही महिनाअगाडि फर्किएका विक्रमबहादुर शाहीले डडेल्धुरामा बागी उम्मेदवारी दर्ता गराएका छन् । एमाले कञ्चनपुरमा पनि असन्तुष्टि र विद्रोह गर्ने उल्लेख्य छन् । टिकट वितरणमा असन्तुष्टि जनाउँदै कञ्चनपुर १ प्रतिनिधि सभामा एमाले नेता खेम सुवेदी बागी उठेका छन् ।
पुराना र क्रियाशील नेतालाई पाखा लगाउँदै अवसरवादीलाई पुरस्कृत गरेको भन्दै सुवेदीले पार्टी परित्याग गरेका छन् । यस्तै, निर्वाचन क्षेत्र नम्बर २(१) मा प्रदेश कमिटी सचिवालय सदस्य टेकबहादुर हमालले पनि विद्रोह गर्दै बागी उठेका छन् । कञ्चनपुर एमालेका संस्थापनकालदेखि नै सक्रिय प्रदेश कमिटी सचिवालय सदस्य जयराज पाण्डेले पार्टी छाडेका छन् ।
उनले क्षेत्र नम्बर २(१) का बागी उम्मेदवार हमाललाई समर्थन गरेका छन् । त्यस्तै, एमाले कञ्चनपुरका उपसचिव कर्णबहादुर चन्दले क्षेत्र नम्बर ३(१)बाट बागी उम्मेदवारी दिएका छन् । एमाले केन्द्रीय सदस्य सहदेव बोगटीले बाजुराको प्रदेशसभा (१) बाट स्वतन्त्र उम्मेदवारी दर्ता गराएका छन् । कैलालीमा टिकट वितरणमा असन्तुष्टि जनाउँदै एमाले सुदूरपश्चिम प्रदेश कमिटी सदस्य मानबहादुर रावलले राजीनामा दिएका छन् ।
