१३ भदौ , काठमाण्डौ ।
अमेरिकामा बेपत्ता ममता काफ्लेको अझै अत्तोपत्तो छैन् । उनको हत्या अझै रहस्यमय छ । प्रहरीले उनका श्रीमानलाई मुख्य अभियुक्त बनाउँदै पक्राउ गरेको छ । आमा बेपत्ता र बाबु प्रहरी हिरासतमा पुगेपछि अभिभावकविहीन भएकी उनीहरुकी एक वर्षीया छोरीले अहिले भने हजुरआमाको काख पाएकी छन् ।
अमेरिकामा विगत एक महिनादेखि वेपत्ता भएकी ममता काफ्लेकी छोरीलाई उनकी हजुरआमा र मामाको जिम्मा लगाइएको छ। ममता बेपत्ता रहेको र श्रीमान नरेश भट्ट बेपत्ताकै अभियोगमा पक्राउ परेपछि उनकी एक वर्षकी छोरीलाई प्रहरी अधिकारीले सामाजिक संस्थाको जिम्मा लगाइएको थियो ।
अमेरिकी प्रहरीले नाम दिएको ‘मिनी ममता’ ले अहिले आफ्नी हजुरआमाको काख पाएको ममताकी आमालाई अमेरिका पुर्याउन पहल गरेकी इमिग्रेसन वकिल बन्दा शर्मा दाहालले बताएकी छिन् । ममताकी आमा र भाइ मंगलबार बिहान अमेरिका पुगेका थिए । पुगेलगत्तै उनीहरुले ‘मिनी ममता’ लाई जिम्मा लिएका हुन् ।
वकिल बन्दा शर्मा दाहाल उनीहरुलाई ‘प्राइभेसी’ दिन अपिल गरेकी छन् । ‘उहाँहरु अरुसँग कुरा गर्ने अवस्थामा हुनुहुन्न, केही समय उहाँहरुलाई कुनै पनि दख्खल नदिन आग्रह गर्छु,’ उनले अमेरिकी संचारमाध्यामहरुमा भनेकी छन् । दाहालका अनुसार हजुरआमा आउनुअघि ममताकी एक निकट साथीले उनको छोरीको हेरविचार गरिरहेकी थिइन् ।
‘मिनी ममता’ लाई सबैले माया गरेको र उनी राम्रो अवस्थामा रहेको दाहालले बताएकी छन् । ममताकी छोरीका लागि नेपाली समूदायले आर्थिक संकलन अभियान चलाइरहेका छन् । गो फन्ड मार्फत अहिलेसम्म २ लाख ६० हजार डलर संकलन भइसकेको छ । साढे दुई लाख डलरको लक्ष्य राखेर अभियान सुरु गरिएको हो ।
गो फन्ड मीमै अर्को अभियानमा ३० हजार डलर संकलन भएको छ । संकलित सबै रकम ममताकी छोरीको भविष्यका लागि हस्तान्तरण गरिनेछ । ममताका श्रीमान नरेश प्रहरी हिरासतमा नै रहेका छन् । एक महिनायता ममतालाई न कसैले देखेको छ, न उनको अवस्थाबारे कसैलाई जानकारी छ ।
अमेरिकास्थित भर्जिनियाको मनसास पार्क प्रहरीले उनको खोजीमा ठोस उपलब्धि हासिल गर्न सकेको छैन् । उनका श्रीमान् नरेश भट्टमाथि प्रर्याप्त प्रमाणको अभावमा शव व्यवस्थापन गरेको आरोप लगाएपनि उनैले हत्या गरेको हुन् सक्ने आशंका मात्रै प्रहरीले गरेको छ । अगस्ट २२ मा नरेशमाथि ममताको शव लुकाएको अभियोग लगाइएको थियो ।
उनी २३ अगस्ट र २६ अगस्ट गरी दुईपटक प्रिन्स विलियम अदालतमा उपस्थित भइसकेका छन् । तर, नरेशले आफूमाथिको आरोप निरन्तर अस्वीकार गर्दै आएका छन् । मानासस पार्कका प्रहरी प्रमुख मारियो लुगोले आफूहरूले सक्रियरूपमा ममताको खोजी गरिरहेको बताएका छन् ।
नरेशलाई हिरासतमा राखेर अनुशन्धान गर्न अक्टोबरसम्मको समय पाएको प्रहरी मंगलबार दोस्रो पटक ममता र नरेशको घर पुगेको छ । उनीहरूले ममतालाई के भयो भन्ने थप प्रमाणहरू खोज्न अर्को खोजी वारेन्ट लिएर घरमा पुगेको स्थानीय संचारमाध्यामहरुले उल्लेख गरेका छन् । काभ्रेकी ममताले भारतको बैंग्लोर बसेर नर्सिङ पढ्दैगर्दा सामाजिक सञ्जालमार्फत् भएको चिनाजानीलाई नरेशसँग विवाहमा परिणत गरेकी थिइन् ।
