८ चैत , एजेन्सी ।
विश्वकै धनाढ्य सामाजिक संजाल एक्सका मालिक एलन मस्कको चिपबाट मानिसलाई नियन्त्रण गर्ने बहुप्रतिक्षित योजना सफल भएको छ । मानव मस्तिष्कमा चिप प्रत्यारोण गरी ‘न्युरोलिंक’ सोचेरै कम्प्युटर चलाउन सफल भएको छ । ‘न्युरोलिंक’का एक इन्जिनियरले एक्समा लाइभ आउँदै न्युरोलिंक चिप प्रत्यारोपण गरिएका व्यक्तिले कम्प्युटर चलाउन सफल भएको भिडियो सार्वजनिक गरेका हुन् ।
दुबै हात गुमाएका २९ वर्षीय एकजना युवकको मस्तिष्कमा न्युरोलिंक चिप प्रत्यारोपण गरिएको थियो । ती व्यक्तिले सोचेरै आफ्नो अगाडि रहेको कम्प्युटरमा चेस गेम खेलर देखाएका छन् । टेस्ला मोटर्सका सीईओ तथा ‘स्पेस एक्स’ का संस्थापक एलोन मस्कले गत जनवरीमा मानव मस्तिष्कमा चिप प्रत्यारोणबाट सोचेकै भरमा कम्प्युटरदेखि मोबाइलसम्म चलाउन सकिने दाबी गरेका थिए ।
उनले प्रारम्भिक परिणामहरुले आशाजनक न्युरो स्पाइक पत्ता लगाउने देखिएको उल्लेख गरेका थिए । उनले न्युरोलिंक चिपको सुरुवात हात गुमाएका व्यक्तिहरुबाट गरिने जनाएका थिए । सोहीअनुसार मस्तिष्कमा चिप प्रत्यारोपण गरिएका एक जनाले कम्प्युटर चलाउन सफल भएको सार्वजनिक गरिएको छ । न्युरोलिंकले सार्वजनिक गरेको भिडियोमा हात चलाउन नसक्ने व्यक्तिले आफ्नो अगाडि रहेको ल्यापटपमा सोचेरै गतिविधिहरु गर्न सफल भएको देखिन्छ ।
गत वर्षको मे मा मात्रै मस्कको स्टार्ट–अप न्यूरालिङ्क कम्पनीले अमेरिकी नियामकहरूबाट मानिसहरूमा आफ्नो मस्तिष्क प्रत्यारोपण परीक्षण गर्न स्वीकृति प्राप्त गरेको थियो । मस्क एक्स, स्पेसएक्स, टेस्ला र अन्य धेरै कम्पनीका मालिक पनि हुन्। उनी आफ्ना कम्पनीहरूको बारेमा महत्वाकांक्षी भविष्यवाणीहरू गर्नका लागि परिचित छन् ।
जुलाई २०१९ मा उनले संकल्प लिएका थिए कि न्यूरालिङ्कले सन् २०२० मा मानिसमा आफ्नो पहिलो परीक्षण सञ्चालन गर्न सक्षम हुनेछ । मानव मस्तिष्कमा राख्नुअघि सिक्काको आकारको उत्पादनको प्रोटोटाइप बाँदरको खप्परमा प्रत्यारोपण गरिएको थियो। प्रस्तुतिको क्रममा, कम्पनीले धेरै बाँदरहरूलाई केही आधारभूत भिडियो गेमहरू ’खेलिरहेको’ देखाएको थियो ।
