१६ मंसिर, काठमाण्डौ ।
नेकपा एमालेका नेता महेश बस्नेतले ऊर्जा क्षेत्रमा ठूलो नीतिगत भ्रष्टाचारको तयारी भइरहेको गम्भीर आरोप लगाएका छन् । मंगलबार सामाजिक सञ्जालमार्फत नेता बस्नेतले ५ हजार मेगावाट विद्युत खरिद सम्झौताका नाममा ५ अर्ब रुपैयाँको आर्थिक चलखेलको तयारी भएको दाबी गरेका हुन् ।
बस्नेतले उर्जामन्त्री कुलमान घिसिङ र अर्थमन्त्री रामेश्वर खनालको मिलेमतोमा ‘टेक अर पे’ प्रावधान राखी पीपीए गराउने र त्यसबापत मोटो रकम असुल्ने प्रपञ्च भइरहेको उल्लेख गरेका छन् ।
नेता बस्नेतले अघिल्लो सरकारले बजेट वक्तव्यमार्फत नै ‘टेक अर पे’ मोडेलमा पीपीए नगर्ने नीति लिएको स्मरण गराएका छन् । बिजुलीको आन्तरिक खपत वृद्धि नभएको, भारतीय बजारको सुनिश्चितता नभएको र ‘रन अफ दि रिभर’ आयोजनाको बाहुल्यताले ऊर्जा सुरक्षामा जोखिम बढेको भन्दै उक्त नीति रोकिएको थियो ।
साथै, सुक्खायाममा बिजुली अभाव हुने तर वर्षायाममा खेर जाने अवस्था र नेपाल विद्युत प्राधिकरणको कमजोर वित्तीय स्वास्थ्यका कारण प्राधिकरणलाई थप भार नपार्न यस्तो निर्णय गरिएको उनको भनाइ छ ।
तर, अहिले सोही नीति उल्ट्याउँदै ५ हजार मेगावाटको पीपीए गर्ने तयारी भइरहेको उनले दाबी गरेका छन् । बस्नेतले लेखेका छन्, ‘अहिले प्रवद्र्धकहरूसँग प्रतिमेगावाट १० लाख उठाउने गरी कुलमान र रामेश्वर खनालको डिजाइनमा ५ हजार मेगावाटको ‘टेक अर पे’ पीपीए गर्ने प्रस्ताव अर्थ मन्त्रालयको सहमतिमा मन्त्रिपरिषद्बाट स्वीकृत गराउने तयारी छ।’
साथै, बस्नेतले यो सेटिङको मुख्य उद्देश्य ५ अर्ब रुपैयाँ सङ्कलन गरी चुनावी खर्चको जोहो गर्नु रहेको दाबी समेत गरे। उनले ५ हजार मेगावाटको पीपीए गर्दा प्रतिमेगावाट १० लाखका दरले कमिसन उठाउने योजना रहेको जिकिर गरेका छन् ।
उनले लेखेका छन्, ‘यो काम फत्ते गरेपछि मात्र पदबाट राजीनामा दिने कुलमानको योजना छ।’ यदि यो निर्णय कार्यान्वयन भएमा नेपाल विद्युत प्राधिकरण आर्थिक रूपमा टाट पल्टने निश्चित रहेको चेतावनी समेत बस्नेतले दिएका छन् ।
यता बस्नेतले वर्तमान सरकारका मन्त्रीहरूमाथि यस्ता गम्भीर आर्थिक अनियमितताको आरोप लगाएपछि शिक्षामन्त्री महावीर पुनले त्यसको व्यंग्यात्मक प्रतिवाद गरेका छन् ।
बस्नेतको ५ अर्ब रुपैयाँको ‘सेटिङ’ गरेको आरोपसहितको पोस्ट सामाजिक सञ्जालमा सेयर गर्दै मन्त्री पुनले बस्नेत र उनको पार्टीले विगतमा गरेका कामप्रति तिखो व्यंग्य प्रहार गरेका हुन् ।
मन्त्री पुनले एमाले नेता बस्नेतको अभिव्यक्तिलाई ‘हाँसउठ्दो’ भन्दै टिप्पणी गरेका छन्। उनले विगतमा सत्तामा हुँदा उनीहरूले देशको कायापलट गरेजस्तो गरी अहिले अरूलाई अर्ती दिएको भन्दै आश्चर्य प्रकट गरे ।
‘के के न आफूहरूले साह्रै राम्रो काम गरेर नेपाललाई स्वर्ग जस्तै बनाएको र नेपाललाई अति सम्पन्न तथा भ्रष्टाचारमुक्त बनाए जस्तो कुरा गर्छ बा यो भाइले– म त हाँसेरै मर्छु कि क्या हो।’ शिक्षामन्त्री पुनले लेखेका छन् ।
बस्नेतको दाबीलाई शिक्षामन्त्री पुनले आधारहीन र हास्यास्पद भन्दै सामाजिक सञ्जालमार्फत खण्डन गरेका हुन् ।
