७ मंसिर , एजेन्सी ।
युट्युबमा सबैभन्दा बढी सब्स्क्राइबर भएका व्यक्ति मिस्टर बिस्ट र सबैभन्दा छिटो सब्स्क्राइबर बढाएर कीर्तिमाननै बनाएका चर्चित फुटबलर क्रिस्टियानो रोनाल्डोले मिस्टर बिस्टलाई आफ्नो कार्यक्रममा अतिथि बनाएका छन् । सो क्रममा बिस्टले रोनाल्डोलाई भिडिओमा कसरी भ्युज बढाउने ट्रिक सिकाएका छन् ।
इन्टरनेट तोड्ने दाबीका साथ कार्यक्रममा बोलाइएका रोनाल्डोका अतिथि बिस्टले भ्युज बढाउने टिप्स दिएका हुन् । यसअघि रोनाल्डोले आफू शोमा इन्टरनेट नै तोड्ने अतिथि ल्याउन लागेको दाबी गरेका थिए । ती अतिथि को होलान् भन्ने धेरैको चासो थियो ।
प्रायःले रोनाल्डोका अतिथि लिओनल मेसी हुने अपेक्षा गरेका थिए । तर, रोनाल्डोले युट्युबका आफ्ना नयाँ प्रतिद्वन्द्वी मिस्टर बिस्टलाई ल्याएका छन् । खासगरी मिस्टर बिस्टले आफू कस्ता भिडिओ किन र कसरी बनाउँछन् भन्ने विषयको जानकारी दिएका छन् ।
युट्युबमा कहिलेसम्म भिडिओ बनाउँछन् अनि रोनाल्डोलाई प्रतिद्वन्द्वीका रूपमा हेर्छन् वा हेर्दैनन् भन्ने विषयमा पनि सोधेका छन् । त्यसबाहेक मिस्टर बिस्टले रोनाल्डोलाई फुटबल सम्बन्धी विभिन्न कन्टेन्ट ल्याउन पनि सुझाव दिएका छन् ।
“हामी जुन कारणले तपाईंलाई हेर्न चाहिरहेका छौं, तपाईंले त्यस्तै कन्टेन्ट ल्याउनु पर्छ,” मिस्टर बिस्टले भनेका छन्, “समकालीन फुटबलरलाई ल्याएर कुनै शो बनाउन सक्नुहुन्छ । जसरी मैले स्क्वाड गेम बनाएको थिएँ, त्यस्तै कुनै गेम खेलाउन सक्नुहुन्छ ।”
कस्ता भिडिओ मान्छे हेर्न चाहन्छन् भन्ने विषयमा पनि रोनाल्डो र मिस्टर बिस्टले चर्चा गरेका छन् । भिडिओको अन्तिममा रोनाल्डोले आफ्नो सबैभन्दा कडा प्रतिद्वन्द्वी क्लब अल हिलाल रहेको बताएका छन् । साउदीमा रेकर्ड गरिएको सो भिडिओमा रोनाल्डोले बिस्टलाई उनले चाहेकै समयमा स्वागत गर्ने बताएका छन् ।
रोनाल्डोले आफूले युट्युब सुरु गरेको देख्दा तपाईंलाई कस्तो महसुस भयो ? भनेर सोधेका छन् जसको जवाफमा बिस्टले तपाईं युट्युब च्यानल खोल्नुहुन्छ भन्ने आफूलाई पहिले नै लागेको र एक महिनामा दुई करोड वा तीन करोड सब्स्क्राइबर पु¥याउनु हुन्छ कि भन्ने ठानेकोमा छ करोड पु¥याएर रेकर्ड बनेको बताएका थिए ।
रोनाल्डोले बनाएको ६ करोड सब्स्क्राइबर पुरा गर्न आफूलाई १३ वर्ष लागेको बिस्टले बताएका छन् । रोनाल्डोकोे म तपाईंलाई पछि पार्न सक्छु ? भन्ने प्रश्नमा बिस्टले रोनाल्डोले अरु फुटबलर ल्याएर आफैले खेलेका उत्कृष्ट गेम रियाक्ट गर्न थाले आफूलाई पछि पार्न सक्ने बताएका छन् ।
यस्तै बिस्टले ठूलो खेलपछि माइक अगाडि बसेर पाँच मिनेटको छोटो कुरा ,कुनै गेमपछि अनुभव कस्तो हुन्छ, गोल गर्दा कस्तो महसुस हुन्छ भन्ने जानकारी दिन सुझाएका छन् । साथै उनले रोनाल्डोका उत्कृष्ट १० गोलको भिडिओ रियाक्ट, चर्चित बाइसाइकल किकका विषयमा जान्न आफूसमेत इच्छुक रहेको बताएका छन् ।
यस्तै रोनाल्डाले एक अर्ब फलोअर पूरा गर्दा आफू अचम्मित नभएको बताएका छन् । उनले मानिसहरूले म र फुटबलप्रति कस्तो रुची राख्छन् भन्ने राम्रोसँग थाहा भएको बताएका छन् । यस्तै बिस्टले भिडिओमा राख्ने थम्बनेलका बारेमा पनि रोनाल्डोलाई सुझाव दिएका छन् ।
उनले थम्बनेलमा अनुहार राख्न, थम्बनेलका लागि फोटो लिँदा मुख बन्द गर्न र फोटो थम्बनेलमा प्रयोग गर्दा अनुहारमा एक्सप्रेसन देखिनुपर्ने सुझाव दिएका छन् । रोनाल्डोको प्रश्नमा बिस्टले आफ्ना धेरै समर्थक दक्षिण अमेरिकामा रहेको भन्दै चिली गएको समयमा समर्थकहरूले पूरै होटेल घेरेपछि होटेल नै छोड्नुपरेको घटना सुनाएका छन् ।
रोनाल्डोले बिस्टलाई युट्युबबाट कहिले सन्यास लिने भन्ने पनि प्रश्न गरेका छन् । जसको जवाफमा बिस्टले आफूले कहिल्यै पनि सन्यास नलिने बताएका छन् । उनले आफू ९० वर्ष हुँदा पनि भिडिओ बनाइरहेको हुने र आफूलाई १०० वर्षभन्दा बढी बाँच्ने चाहाना रहेको बताएका छन् ।
अहिले रोनाल्डोका ६८ बिलियन सब्स्क्राइबर छन् भने मिस्टर बिस्टका ३३१ मिलियन रहेका छन् । जबकि बिस्टले ८३१ भिडियो पोस्ट गरेका छन् भने रोनाल्डोले मात्रै ७१ भिडियो पोस्ट गरेका छन् । इन्टरनेट तोड्ने शीर्षकको रोनाल्डो र बिस्टको कुराकानीको यो भिडियो भने १८ घण्टामा १६ मिलियन भन्दा बढी पटक हेरिसकिएको छ ।
