११ भदौ, विराटनगर ।
राष्ट्रिय स्वतन्त्र पार्टी (रास्वपा) का निलम्बित महामन्त्री डा. मुकुल ढकाल पार्टीको साधारण सदस्यसमेत नरहने गरी निष्काशित भएका छन् । पटक-पटक सोधिएको स्पष्टीकरणको जबाफ चित्तबुझ्दो नआएपछि रास्वपाले उनलाई साधारण सदस्यबाट समेत हटाउने गरेको हो ।
केन्द्रीय कार्यालय च:मतिमा मंगलबार बिहान बसेको केन्द्रीय समिति बैठक ढकाललाई साधारण सदस्यबाट समेत हटाउने निर्णय गरेको हो । पार्टीविरुद्ध निरन्तर रूपमा खनिएका डा. ढकाललाई रास्वपाले ३५ दिनको समय दिएर पटक-पटक स्पष्टीकरण सोधेको थियो ।
तर, पार्टी सभापति रवि लामिछानेलाई विविध आरोप लगाउँदै आएका ढकालले चित्तबुझ्दो स्पष्टीकरण नदिएपछि पार्टीभित्र उनलाई निष्काशित गर्नुपर्ने माग उठेको थियो । सोहीअनुरूप ढकाल कारबाहीमा परेका हुन् ।
यसअघि पार्टी अनुशासन र आचरणविपरीत गतिविधि गरेको भन्दै रास्वपाले यसअघि ढकालको महामन्त्री र प्रवक्ता पद खोसेको थियो ।
जिल्ला-जिल्ला घुमेर नेता, कार्यकर्ताका सुझावमा आधारित रही ढकालले पार्टीमा प्रतिवेदन पेस गरेका थिए । त्यसपछि ढकालमाथि रास्वपाले स्पष्टीकरण र कारबाही प्रक्रिया सुरु गरेको थियो ।
