२७ मंसिर, काठमाण्डौ ।
अर्जेन्टिनाका विश्व स्टार फुटबल खेलाडी लियोनेल मेस्सी अहिले भारतमा छन् । उनी आज बिहान भारतको कोलकाता आइपुगेका हुन् । उनको साथमा लुइस सुआरेज र रोड्रिगो डे पल पनि छन् ।
मेस्सी जीओएटी (गोट) इन्डिया टुर २०२५ अन्तर्गत कोलकाता आइपुगेको भारतीय सञ्चारमाध्यमले उल्लेख गरेका छन् । मेस्सी हेर्न हजारौँ फ्यान कोलकाता विमानस्थलमा भेला भएका थिए ।
समाचार एजेन्सी पीटीआईका अनुसार, मेस्सीलाई स्वागत गर्न हजारौँ मानिस मध्यरात पछिसम्म पर्खिरहेका थिए । उनको विमान शनिबार बिहान २ः२६ बजे कोलकातामा अवतरण भयो ।
मेस्सीले जीओएटी इन्डिया टुर २०२५ अन्तर्गत भारतमा तीन दिन बिताउनेछन् । यस क्रममा उनले भारतका चार सहर भ्रमण गर्नेछन् । यससंगै मेस्सीलाई नजिकबाट हेर्ने र आफ्नो देशमा स्वागत गर्ने भारतका फुटबल प्रशंसकहरूको लामो प्रतीक्षा समाप्त भएको छ ।
यद्यपि, विश्वकप विजेतासँग व्यक्तिगत रूपमा भेट गर्ने आशा राख्नेहरूका लागि, यो अनुभव महँगो शुल्कसहितको हुनेछ । ‘द जीओएटी इन्डिया टुर २०२५’ का आयोजकहरूले घोषणा गरेअनुसार मेस्सीसँग एउटा तस्बिर खिच्नका लागि जीएसटीबाहेक ९.९५ लाख रुपैयाँ लाग्नेछ ।
मेस्सीको ‘द जीओएटी इन्डिया टुर २०२५’ कोलकाता, हैदराबाद, मुम्बई र नयाँदिल्ली गरी चार प्रमुख सहरहरूमा फैलिएको छ । यो भ्रमणमा मुख्य स्थानहरूमा सार्वजनिक उपस्थिति, सांस्कृतिक कार्यक्रमहरू र सेलिब्रिटी फुटबल प्रदर्शनीहरू समावेश गरिएका छन् ।
उनले आफ्नो भारत यात्राको सुरुआत कोलकाताबाट गरेका छन । यहाँ उनले एउटा मैत्रीपूर्ण खेल खेल्नेछन् । यस्तै आफ्नो ७० फिट अग्लो मूर्तिको अनावरण गरेका छन्। मेस्सीले कोलकातामा अभिनेता शाहरुख खानसंग पनि भेट गरेका छन् ।
भारतीय क्रिकेट टोलीका पूर्वकप्तान सौरभ गांगुलीसँग पनि भेट गर्ने बताइएको थियो । यसपछि उनी हैदराबाद, मुम्बई र दिल्ली जाने कार्यक्रम छ । हैदराबादमा उनले आफ्नो सम्मानमा आयोजित गरिएको एक कन्सर्टमा सहभागी हुने र एउटा मैत्रीपूर्ण खेल पनि खेल्ने बताइएको छ ।
त्यस्तै, दिल्लीमा प्रधानमन्त्री नरेन्द्र मोदीसँग उनको भेटघाटको कुरा पनि भइरहेको बताइएको छ । भारत आउनुअघि मेस्सीले त्यहाँको यात्रा गर्नु र प्रशंसकहरूसँग भेट्नु सम्मानको कुरा भएको बताएका छन् ।
उनले सामाजिक सञ्जाल एक्समा लेख्दै भने, “भारत फुटबलका लागि मरिमेट्ने देश हो र म यहाँ प्रशंसकहरूको नयाँ पुस्तासँग भेट्न र यो सुन्दर खेलप्रतिको मेरो प्रेमलाई बाँड्नका लागि उत्साहित छु ।”
यसैबीच फिफा विश्वकप २०२६ का लागि ५० लाख टिकटको माग भइसकेको अन्तराष्ट्रिय फुटबल संघ (फिफा) ले बताएको छ । बिहिबारदेखि अहिलेसम्म २ सय भन्दा बढी देशका समर्थकहरुले टिकट माग गरेको फिफाले जनाएको छ।
जसमा २७ जुनमा मियामीमा हुने कोलम्बिया र पोर्चुगलबीचको खेलका लागि सबैभन्दा बढी टिकटको माग भएको छ । अर्को वर्ष अमेरिका, क्यानडा र मेक्सिकोमा हुने विश्वकपको टिकटको मुल्यलाई लिएर अहिले तिव्र आलोचना भइरहेको छ ।
जसलाई फुटबल समर्थक संघ (एफएसए) ले अपमानजनक भनेको छ । २०२६ को विश्वकपको समूूह चरणको टिकट २०२२ मा भन्दा कतार विश्वकपको भन्दा तीन गुणा मुल्य बढाइएको छ। जबकी फाइनलका लागि सस्तो टिकटको मुल्य ३,११९ पाउण्ड स्टर्लङ रहेको छ ।
विश्वकप २०२६ को फाइनलका लागि सबैभन्दा सस्तो टिकट कतार विश्वकपको तुलनामा सात गुणा बढी मुल्य वृद्धी गरिएको छ । समर्थकहरुले फिफासँग मुल्य निर्धारण नितिमा वार्ता गर्नका लागि विक्री प्रक्रिया रोक्न माग र्दै एफएसएले फुटबल समर्थक युरोप (एफएसइ) सँग सामेल भएको छ ।
फिफाका अनुसार सबैभन्दा बढी टिकट माग तीन आयोजक राष्ट्रबाट आएको छ । त्यसपछि कोलम्बिया, इङल्यान्ड, इक्वेडर, ब्राजिल, अर्जेन्टिना, स्कटल्यान्ड, जर्मनी, अस्ट्रेलिया, फ्रान्स र पानामाबाट आएको छ । विश्वकपमा पहिलो पटक ४८ राष्ट्र सहभागी हुदैछन् ।
