१८ भदौ, एजेन्सी ।
रुससँग डेढ वर्षदेखि युद्ध लडिरहेका युक्रेनी राष्ट्रपति भोलोदिमिर जेलेन्स्कीले आफ्ना रक्षामन्त्री ओलेक्सी रेज्निकोभलाई पदबाट बर्खास्त गरेका छन् । फेब्रुअरी २०२२ मा युक्रेनमा रुसले आक्रमण गर्नुअघि रेज्निकोभले मन्त्रालय सम्हालेका थिए । उनको स्थानमा युक्रेनको राज्य सम्पत्ति कोषका प्रमुख रुस्तम उमरोभलाई नयाँ रक्षामन्त्री बनाइने भएको छ ।
अब रक्षा मन्त्रालयमा नयाँ दृष्टिकोण आवश्यक भएको जेलेन्स्कीले बताएका छन् । युक्रेनी मिडियाको अनुमान अनुसार रेज्निकोभलाई बेलायतका लागि युक्रेनको राजदूत बनाइने सम्भावना छ । रेज्निकोभले हालै वरिष्ठ बेलायती मन्त्रीहरूसँग राम्रो सम्बन्ध विकास गरेका थिए । आफ्नो नियमित रात्रिकालीन सम्बोधनका बेला राष्ट्रपति जेलन्स्कीले रक्षामन्त्रालयमा अब ‘नयाँ शैली’ अपनाउनुपर्ने समय आएको बताए ।
जेलेन्स्कीले भनेका छन्, “मन्त्रालयले नयाँ शैली अपनाउनुपर्ने तथा सेना एवं समग्र समाजसँग अन्य माध्यमका अन्तरक्रिया गर्नु पर्ने आवश्यकता रहेको मेरो विश्वास छ,”। रेज्नीकोभको विस्थापनलाई कतिपयले अनुमान गरिसकेका थिए । त्यसलाई जेलेन्स्कीले सबै सरकारी विभागहरूमा भ्रष्टाचार नियन्त्रण गर्न खोजेका प्रयाससँग जोडेर हेरिएको छ ।
हुन् त रेज्नीकोभलाई प्रत्यक्ष कुनै गल्तीको अभियोग लागेको छैन् । तर उनको मन्त्रालयले खरिदसम्बन्धी विभिन्न काण्डहरू झेलिरहेको छ । रेज्नीकोभको विस्थापन त्यतिखेर भएको छ जतिखेर युक्रेनले पश्चिमा सहयोगीहरूबाट प्राप्त अत्याधुनिक अस्त्रको बलमा रुसविरुद्ध प्रत्याक्रमण गरिरहेको छ । यु
द्धका अग्रमोर्चामा प्रगति निकै धीमा गतिमा भएका छन् तर आइतवार वरिष्ठ युक्रेनी जर्नेलहरूले तिनका फौजले दक्षिणी भागमा रुसी रक्षा पङ्क्तिको एउटा महत्त्वपूर्ण लाइन भत्काएर अघि बढेको बताएका छन् । यसबीच रुसले रातको समयमा आफ्ना भूभागमा कैयन् ड्रोन हमलाका प्रयास भएको बताएको छ ।
नयाँ रक्षामन्त्रीमा नियुक्त भएका उमरोभले रुसी आक्रमणको प्रारम्भिककालमा भएका शान्ति वार्ताहरूमा युक्रेनको प्रतिनिधित्व गरेका थिए । सन् २०२२ को मार्चमा शान्ति वार्ताका बेला उनमा विष खुवाइएको लक्षण देखा परेका शङ्का गरिएका थिए । तर पछि उनले ती विवरणको खण्डन गरेका थिए ।
