१३ असार, एजेन्सी ।
युरोपेली च्याम्पियनसिप २०२४ को नकआउट चरणको समीकरण पूरा भएको छ । समूह चरणको सम्पूर्ण खेल समाप्त भएसँगै युरोको राउन्ड अफ १६ मा खेल्ने टोलीको छिनोफानो भएको हो । सहभागी २४ टोलीमध्य ८ टोलीले अर्को चरणमा स्थान बनाउन सकेनन् ।हंगेरी, स्कटल्यान्ड, क्रोएसिया,अल्बानिया, सर्बिया, पोल्यान्ड, युक्रेन र चेकिया समूह चरणबाट अघि बढ्न सकेनन् ।
अब अन्तिम १६ मा स्पेनले जर्जियासँग खेल्दा जर्मनी र डेनमार्कले एक अर्काको सामना गर्नेछन् । यी दुई खेलको विजेताले क्वाटरफाइनलमा भिड्नेछन् । त्यस्तै पोर्चुगल र स्लोभेनियाको विजेताले सेमिफाइनलमा पुग्न फ्रान्स र बेल्जियमबीचको विजेतासँग प्रतिस्पर्धा गर्नेछ । रोमानिया र नेदरल्यान्ड्स एक अर्कासँग खेल्दा अष्ट्रिया र टर्कीबीच प्रतिस्पर्धा हुनेछ ।
यी मध्य एक टोलीले इंग्ल्याण्ड र स्लोभाकिया तथा स्विटजरल्यान्ड र इटालीको खेलको जित्ने टोलीबीचको विजेतासँग खेल्नेछन् । शनिबारदेखि राउन्ड अफ १६ चरण सुरु हुनेछ । क्वाटरफाइनलका खेल जुलाई ५ बाट खेलिनेछ ।गएराती भएको समूह ’एफ’ को अन्तिम खेलमा पोर्चुगल जर्जियासँग २–० गोलले पराजित गर्यो । जर्मनीको गेल्सनकर्केनमा रहेको भेल्टिन्स एरिनामा जर्जियासँग हारे पनि पोर्चुगल समूह विजेता बनेको छ ।
जर्जियाको जितमा नेपोलीका विंगर क्विचा क्भारात्क्षेलियाले पहिलो र जर्जेस मिकाउताद्जेले पेनाल्टीमा दोस्रो गोल गरे । समूहको अर्को खेलमा टर्कीले चेक रिपब्लिकलाई २–१ गोलले पराजित गर्दै अन्तिम १६ मा स्थान बनायो । टर्कीका लागि कप्तान हाकान चाल्हानोग्लु र चेन्क तोसुनले गोल गरे । चेक रिपब्लिकका कप्तान टोमस सुचेकले एक गोल मात्र फर्काउन सके ।
यो समूहमा पोर्चुगल र टर्की समान ६–६ अङ्कका साथ क्रमशः पहिलो र दोस्रो स्थानमा छन् । पहिलो पटक युरोकपमा छनोट भएको जर्जिया पनि चार अङ्कका साथ अन्तिम १६ मा प्रवेश गरेको छ । एक अङ्क जोडेको चेक रिपब्लिक बाहिरिएको छ । यस्तै समूह ’ई’ को अन्तिम चरणको खेलमा बेल्जियम र युक्रेनले गोलरहित बराबरी खेलेका छन् ।
यही समूहको अर्को खेलमा रोमानिया र स्लोभाकियाले पनि १–१ गोलको को बराबरी खेले । योसँगै यस समूहका चारवटै टोलीको समान चार अङ्क भएको छ । गोल अन्तरका आधारमा रोमानिया समूह विजेता र बेल्जियम उपविजेता हुँदै अन्तिम १६ मा पुगेका छन् । स्लोभाकिया तेस्रो हुँदा युक्रेन पुछारमा रहेर समूह चरणबाट बाहिरिएको छ ।
