११ जेठ, काठमाण्डौ ।
फेरिपनि नागरिकता र राहदानी सम्बन्धी मुद्या परेपछि राष्ट्रिय स्वतन्त्र पार्टीका सभापति रवि लामिछाने चिढिएका छन् । उनी स्वयंले नागरिकता र राहदानीको कुरालाई लिएर आफूलाई इरिटेट गरिएको बताएका छन् । उनीमाथि सांसद पदको योग्यतामाथि प्रश्न उठाउँदै पुनः हिजो युवराज सफलले सर्वोच्चमा अर्को रिट दायर हालेका छन् ।

यसैलाई लिएर रविले फेसबुकमा लेखेका छन्, ‘मुद्दा हाल्नु र मुद्दा हाल्ने उद्योग चलाउनु दुई अलग कुरा हुन् । मान्छेलाई इरिटेट गर्ने पनि सीमा हुन्छ ।’ उनले सर्वोच्च अदालतले गएको पुस १३ गते गरेको फैसलामा आफूले अमेरिकी नागरिकता त्यागेको निश्चित गरेको बताएका छन् ।

उनले आफूले अमेरिकी नागरिकता त्यागेको सक्कल निस्सा जिल्ला प्रशासन कार्यालय काठमाडौंमा पेस गरी पुनः नागरिकता पनि कायम गराइसकेको बताएका छन् । अमेरिकी राहदानीको सक्कल निस्सा आफूसँगै भएकोमा उक्त निस्सा जेठ ९ गते सर्वोच्च अदालतमा बुझाइ पनि सकेको दाबी गरेका छन् ।

’अदालतमा बुझाइसकेको छु, यसको जानकारी र सक्कल बमोजिम नक्कल मिति २०७५÷०३÷०६ मा अध्यागमनलाई स–प्रमाण बुझाइसकेको थिएँ,’ उनले भनेका छन्, ’टेलिभिजनबाट घोक्रो सुक्नेगरी स–प्रमाण बोलिसकेको थिएँ।’यस्तो छ उनले लेखेको स्टाटस
मुद्दा हाल्नु र मुद्दा हाल्ने उद्योग चलाउनु दुई अलग कुरा हुन्। मान्छेलाई इरिटेट गर्ने पनि सीमा हुन्छ ।

१. सर्वोच्च अदालतको मिति २०७९÷१०÷१३को फैसलाको प्रकरण नं. २२, २८ र ३२ मा मैले अमेरिकी नागरिकता परित्याग गरेको तथ्य ’कन्फर्म’ गरेको छ ।

२. अमेरिकी नागरिकता त्यागेको सक्कल निस्सा जिप्रका काठमाडौंमा पेस गरी नेपाली नागरिकता पुनः कायम गराएको छु ।

३. अदालतले झिकाउनु भनेको अमेरिकी राहदानीको सक्कल निस्सा मैसँग भएकाले मिति २०८०÷०२÷०९ मा सर्वोच्च अदालतमा बुझाइसकेको छु । यसको जानकारी र सक्कलबमोजिम नक्कल मिति २०७५÷०३÷०६ मा अध्यागमनलाई स–प्रमाण बुझाइसकेको थिएँ । टेलिभिजनबाट घोक्रो सुक्नेगरी स–प्रमाण बोलिसकेको थिएँ ।

४. घण्टीलाई बजाउन मात्र होइन घण्टीले बजाउन पनि मिल्छ ।

रविविरुद्ध परेको रिटको पेशी यही १७ गतेका लागि तोकिएको छ । लामिछाने सांसद हुन अयोग्य रहेको भन्दै सर्वोच्चमा रिट दर्ता भएको छ । कायम नरहेको नागरिकताको प्रतिलिपि प्राप्त गरी प्रतिनिधिसभा सदस्यमा निर्वाचित भएका लामिछानेले नागरिकता पुनः प्राप्तिको प्रक्रिया पूरा नगरेको भन्दै रिट दर्ता भएको हो ।