१ भदौ,धनुषा।
यौनशक्ति बढाउन बालकलाई बलि दिन उक्साएको आरोपमा एक झाँक्री पक्राउ परेका छन् ।
गएको वैशाख २३ गते धनुषाको मिथिला नगरपालिका–६ बस्ने शम्भु साहका अढाई वर्षीय छोरा आर्यन साहको बलि दिएको घटनामा मुछिएपछि फरार रहेका ५५ वर्षका झाँक्री जंगली महतो पक्राउ परेका हुन् । पक्राउ परेका झाँक्री मिथिला नगरपालिका–७ कुसुमबिसौनाका बासिन्दा हुन् ।
घटनापछि फरार झाँक्री महतोलाई बिहीबार रक्षाबन्धनको दिन घरबाटै ईलाका प्रहरी कार्यालय ढल्केबरले पक्राउ गरेको जिल्ला प्रहरी कार्यालय धनुषाले जनाएको छ । पक्राउ परेका झाँक्रीमाथि अनुसन्धान भइरहेको धनुषाका प्रहरी उपरीक्षक शेखर खनालले जानकारी दिए।
शक्ति बढाउन भन्दै झाँक्री विद्या सिक्दै गरेका छिमेकी गाउँका ५५ वर्षीय शत्रुधन महतोले गएको वैशाख २३ गते राति बालक आर्यनलाई घरेलु हतियार प्रयोग गरी घाँटी रेटेर बलि दिएका थिए । घटनापछि जिल्ला प्रहरी कार्यालय धनुषा, प्रदेश प्रहरी र संघीय प्रहरी इकाइले संयुक्त रुपमा ६५ जनालाई नियन्त्रणमा लिएर गरेको सूक्ष्म अनुसन्धानको क्रममा छिमेक झाँक्री सत्रुधन महतोले यौनशक्ति बढाउन बालकको बलि दिएको खुलासा भएको थियो ।
उनलाई जिल्ला प्रहरी कार्यालय धनुषाले गएको जेठ १६ गते पत्रकार सम्मेलन गरी सार्वजनिक गरेको थियो । शत्रुधनले आफूलाई झाँक्री सिकाउने छिमेक गाउँका झाँक्री जंगली महतोले यौनशक्ति प्राप्त गर्न र शक्तिशाली बन्न बालकको बलि दिन भनेपछि यस्तो घटना घटाएको प्रहरीमा बयान दिएका थिए । त्यस पछि झाँक्री जंगली महतो फरार भएका थिए ।
