विराटनगर,असार २७
मोरङको पूरानो सदरमुकाम रंगेली नगरपालिकाका मेयर दिलिप बगडियाले ५ बर्षे कार्यकालमा आफूलाई प्राप्त हुने तलव , भत्ता र अन्य कुनैपनि सेवा सुविधा नलिने घोषणा गरेका छन् ।
असार २८ गते मेयर पद सम्हालेका बगडियाको १ बर्ष पुग्दैछ । मेयरले प्राप्त गर्ने मासिक ३० हजार तलव , वोर्ड बैठक भत्ता र विभिन्न गोष्ठी , सेमिनारमा प्राप्त हुने करिब ४५ हजार नलिने बगडियाले बताए ।
बगडियाले प्राप्त भएको यो रकम असाह्य , गरिब तथा विपत्तीमा परेका जनताको भलो हुने काममा खर्च गर्ने बताए । पारिवारिक जीवनको लागि नगरपालिकाबाट प्राप्त कुनै पनि रकम नलिने बगडियाको भनाई छ ।
यस्तै बगडियाले नगरपालिकाको गाडी समेत आफुले प्रयोग नगर्ने घोषणा गरेका छन् । मेयरको लागी खरिद गरिएको गाडी आफुले नचढेर प्रमुख प्रशासकीय अधिकृतलाई प्रयोग गर्न दिएको उनले बताए।
