६ फागुन , काठमाण्डौ।
नेकपा एमालेका महासचिव शंकर पोखरेल र रुसी कुटनीतिज्ञबीच भेटवार्ता भएको छ । विश्व राजनीतिमा हलचल आएसँगै रसियन कुटनैतिक अधिकारीहरुले भेटवार्तालाई तिब्रता दिएका छन् । यसैक्रममा सोमबार पोखरेलसंग नेपालस्थित रुसी दूतावासका डिसीएम, मिनिस्टर–काउन्सिलर आन्द्रे किसेलेन्कोले भेटवार्ता गरेका हुन् ।
भेटवार्ताको क्रममा द्विपक्षीय सम्बन्धको विकासका समसामयिक मुद्दाहरूमा छलफल भएको बताइएको छ । दुतावासका प्रतिनिधिले महासचिव पोखरेलसँग विश्व राजनीति र रुसका प्राथमिक एजेन्डाबारे पनि छलफल गरेको बुझिएको छ ।
भेटपछि दुतावासले विज्ञप्ति जारी गर्दै द्विपक्षीय संवादले एकअर्काको अडान र सम्भावित सहयोगका क्षेत्रहरूको पहिचान गर्न समान बुझाई भएको उल्लेख गरेको छ । नेपाल र रुस बीचको सम्बन्ध औपचारिकतामा मात्र रहेको बेला यो भेटलाई महत्वको साथ् हेरिएको छ ।
नेपाली युवालाई अवैध रुपमा रुस लगेर सेनामा भर्ती गरेको र युद्धमा होमेको विषयमा रुसले अहिलेसम्म मुख खोलेको छैन । यो काम मानव तस्करले गरेको भनिए पनि औपचारिक रुपमा रुसले केहि बताएको छैन ।
रुस–युक्रेन युद्धमा २० जना भन्दा बढी नेपाली युवाको ज्यान गइसकेको छ । एमाले महासचिवले रुसी अधिकारीसंग भेटवार्ता गरिरहँदा यता प्रधानमन्त्रीसमेत रहेका एमाले अध्यक्ष केपी शर्मा ओलीले भने पोखरेललाई दाङवासीले चुनावमा नजिताएकामा चित्त दुखाएका छन् ।
उनले सदनमा र सरकारमा शंकर पोखरेल नहुँदा आफूलाई काम गर्नै असहज भएको समेत जिकिर गरेका छन् । सोमबार दाङको घोराहीमा जनसभालाई सम्बोधन गर्दै एमाले अध्यक्षसमेत रहेका प्रधानमन्त्री ओलीले शंकरलाई चुनाव जिताएर नपठाउँदा विकासको अभियान अघि बढाउन आफूलाई केही समस्या भएको बताएका हुन् ।
दाङ शंकरको गृहजिल्ला पनि हो । २०७९ को निर्वाचनमा शंकर दाङ क्षेत्र नं २ मा माओवादी उम्मेदवार रेखा शर्मासँग १९३ मतले पराजित हुनुपरेको थियो । रेखाले २६ हजार ८८० मत पाउँदा शंकरका पक्षमा २६ हजार ६८७ मत परेको थियो ।
एक त पार्टीको महासचिव त्यसमाथि ओली निकट मानिदै आएका शंकर पोखरेलले ओलीको हरेक कदमको बचाउ गर्दै आएका छन् । सामाजिक संजालदेखि मिडियाहरुमा ओलीका आलोचकहरुविरुद्ध उनी ढाल बन्दै आएका छन् ।
पार्टीका साथै सरकारमा पनि ओलीको नेतृत्वको खुलेर प्रशंसा र बचाउ गर्न उनले कयौं पटक सामाजिक संजालबाटै नेताकार्यकर्तालाई आह्वान गर्दै आएका छन् । यता ओलीले पनि ०७९ को चुनावका लागि दाङवासीसंग गुनासोपछि अब अलमल नगरी मिसन ०८४ तर्फ लाग्न पनि पार्टी पंक्तिलाइ निर्देश गरे ।
‘हामी अलमल नगरी मिसन २०८४ तर्फ लाग्नुपर्छ, तपाईँहरूको साथ चाहिन्छ, देश बदल्ने कामको अगुवाइ गर्ने जिम्मा मेरो हो, कसैले पनि यो अभियानलाई रोक्न सक्दैन,’ उनले भनेका छन् ।
