१९ जेठ, एजेन्सी ।
अमेरिकाले हजारौं आइफोन ‘ह्याक’ गरि सूचना चोरी गरेको रुसले आरोप लगाएको छ । रसियाको संघीय सुरक्षा सेवा (एफएसबी)ले अमेरिकाले जासुसी सफ्टवेयरको प्रयोग गरेर आइफोन ‘ह्याक’ गरेको दाबी गरेको हो ।
एफएसबीले रसियाली नागरिकका साथै रसियामा रहेका विदेशी कूटनीतिज्ञहरुको एप्पल डिभाइसहरु ह्याक भएको दाबी गरेको हो । ‘अमेरिकाको स्पेशल सर्भिसले एप्पल मोबाइल डिभाइस प्रयोग गरेर इन्टेलेजेन्सन एक्सन गरेको फेला पारेको छ,’एफएसबीले भनेको छ ।
एप्पल र अमेरिकाको नेश्नल सेक्यूरिटी एजेन्सी(एनएसए)बिच यो प्रकरणमा निकै नजिकको सहकार्य भएको दाबी एफएसबीले गरेको छ । एप्पलले भने रसियाको आरोपको खण्डन गरेको छ ।
‘हामीले एप्पलका उत्पादक मार्फत यस्तो कार्य गर्न कुनै पनि सरकारसँग काम गरेका छैनौं र गर्ने पनि छैनौं,’ एप्पलले एक विज्ञप्ति जारी गरि भनेको छ । अमेरिकाको एनएसएले भने यी आरोपबारे बोल्न अस्वीकार गरेको रोयटर्सले जनाएको छ ।
मस्कोमा रहेको साइबर सेक्युरिटी र एन्टी भाइरस प्रदायक मल्टिनेश्नल कम्पनी कासपर्सकी ल्याबमा काम गर्ने दर्जनौं कर्मचारीहरुको मोबाइल डिभाइस पनि ह्यकरहरुको निशानामा परेको जनाएको छ ।
कासपर्सकीका सिइओ युजेन कासपर्सकीले यो कार्यलाई ‘ व्यावसायिक रूपमा लक्षित साइबर आक्रमण’ भनेका छन् । कासपर्सकीका अनुसन्धानकर्ता इगोर कुचनेटशोभले आफ्नो कर्पोरेट नेटवर्कमा यो वर्षको सुरुवातदेखि नै असामान्य ट्राफिक देखेको पनि बताएका छन् ।
यसबारेमा कासपर्सकीले बिहीवारमात्रै रसियाको कम्प्युटर एमर्जेन्सी रेस्पोन्स टिमलाई आफ्नो अनुसन्धानबाट प्राप्त नतिजाहरु प्रदान गरेको थियो । यद्यपि, यसमा अमेरिकाकै संलग्नता रहेको नरहेकोबारे भने आफूले भन्न नसक्ने उनले बताएका छन् ।
एफएसबीका अनुसार रसियामा रहेका इजरायल, सिरिया,चीन र नाटो राष्ट्रका कूटनीतिज्ञहरुको मोबाइलहरु अमेरिकी ह्याकरहरुले ह्याक गरेका थिए । यसबारेमा रोयटर्सले ती देशका अधिकारीहरुसँग कुरा गर्न खोजेको थियो । इजरालयले यस विषयमा बोल्न नचाहेको र अन्य देशका अधिकारीहरु उपलब्ध नभएको रोयटर्सले जनाएको छ ।