१७ भदौ ,एजेन्सी ।
युक्रेन युद्धका कारण रुसमाथि इतिहासकै अत्यधिक प्रतिबन्ध लगाएको पश्चिमा राष्ट्र अहिले रुसी ग्यास र इन्धनका लागि तड्पिरहेका छन् । प्रतिबन्धपछि इन्धन खरिद गर्न रुसी मुद्रा रुबलमै कारोबार गर्न अनिवार्य गरेको रुसले पछिल्लो समय धेरै युरोपेली देशको इन्धन आयात कटौती गरेको छ भने धेरै देशमा इन्धन आपूर्ति बन्द गरिदिएको छ ।
पछिल्लो समय तीन दिनका लागि रुसले ग्यास आपूर्ति बन्द गरेको अवस्थामा रुसको सबैभन्दा ठूलो निजी तेल कम्पनी लुकोइलका अध्यक्ष रविल म्यागानोभको रहस्यमय मृत्यु भएको छ । रुसको सरकारी मिडियाका अनुसार रविलले अस्पतालको छैटौं तलाबाट हाम फालेर आत्महत्या गरेका हुन् ।
मिडिया रिपोर्टअनुसार उनी मुटुको नियमित चेकजाँच गर्न अस्पातल पुगेका थिए । पछिल्लो समय उनले आफू डिप्रेशनमा रहेको पनि बताउँदै आएका थिए । उनले छैटौं तलाबाट किन हाम फाले ? उनले हाम फालेका हुन् वा होइनन् ? लगायतको अधिकारिक पुष्टि हुनसकेको छैन ।
उनले जाँच गराउन गएको अस्पातलको बिल्डिङमा निर्माण कार्य चलिरहेको र सो ठाउँको सीसीटीभी पनि नचलेको कारण उनको मृत्यु थप रहस्यमय बनेको अन्तराष्ट्रिय संचारमाध्यामहरुले उल्लेख गरेका छन् ।
रुसले युक्रेनमाथि सुरु गरेको हमलाको निन्दा गर्ने उनी एक्ला ‘हाइ प्रोफाइल’ व्यापारी रहेका थिए । यसैले पनि उनको मरणलाई थप रहस्यका रुपमा हेरिएको छ । उनले गत मार्चमा युक्रेनमाथि रुसले गरेको आक्रमण दुःखद रहेको र युद्ध यथाशीघ्र अन्त्य हुनुपर्ने धारणा व्यक्त गरेका थिए ।
