३१ साउन, विराटनगर ।
पोर्चुगिज स्ट्राइकर क्रिस्टियानो रोनाल्डोआबद्ध अल नासर साउदी सुपर कपको फाइनलमा प्रवेश गरेको छ ।
बुधबार राति भएको खेलमा अल–तावौनलाई २–० ले पराजित गर्दै अल नासर साउदी सुपर कपको उपाधिनजिक पुगेको हो ।
अल नासरलाई फाइनलमा पुर्याउन रोनाल्डो र आयमन याह्याले एक-एक गोल गरे ।
खेलको आठौं मिनेटमै याह्याले गोल गर्दै अल नासरलाई पहिलो हाफभरि १-० गोलको अग्रता दिलाएका थिए । ५७औं मिनेटमा रोनाल्डोले अर्को गोल थपे ।
खेलको इन्ज्युरी समयमा नासर १० खेलाडीमा समेटिएको थियो । नासरका मार्सेलो ब्रोजोभिक रातो कार्ड खाँदै मैदानबाट बाहिरिएका थिए ।
यससँगै साउदी सुपर कपको उपाधिका लागि अल–हिलाल र अल–नासर भिड्ने भएका छन् । हिलाल यसअघि नै अल–अहली साउदीलाई पेनाल्टी सुटआउटमा ४–१ ले पराजित गर्दै फाइनलमा स्थान पक्का गरिसकेको छ ।
