१७ असोज, एजेन्सी ।
इंग्लिस प्रिमियर लिग अन्तर्गत गएराती भएको खेलमा म्यानचेस्टर सिटीले सहरी प्रतिद्वन्दी म्यानचेस्टर युनाइटेडमाथि सानदार जित निकालेको छ । घरेलु मैदान इतिहाडमा भएको खेलमा सिटीले चर्चित फुटबलर क्रिस्टियानो रोनाल्डो आवद्ध युनाइटेडलाई ६–३ गोल अन्तरले हराएको हो ।
पहिलो हाफमा चार गोल गरेको सिटीले दोस्रो हाफमा थप दुई गोल ग¥यो । इंग्लिस प्रिमियर लिग फुटबलमा बहुप्रतिक्षित मानिएको डर्बी भिडन्तमा सिटीको जितमा एर्लिङ ब्राउट हालान्ड र फिल फोडेनले ह्याट्रिक गरे । गोलको वर्षा भएको खेलमा हालान्डले खेलको ३४, ३७ र ६४ औँ मिनेटमा र फोडेनले ८, ४४ र ७२ औँ मिनेटमा गोल गरे ।
पहिलो हाफमा ४–० को अग्रता बनाएको सिटीले दोस्रो हाफमा थप दुई गोल गरेको थियो । तर अन्तिम समयमा पुनरागमनको प्रयास गरेको युनाईटेडले ३ गोल गरे पनि हार टार्न भने सकेन् । युनाइटेडका लागि खेलको ५६ औँ मिनेटमा एन्टोनीले गोल गरे । यस्तै एन्थोनी मार्सियलले खेलको ८६ औँ र दोस्रो हाफको इन्ज्युरी समयमा गोल गरे ।
यो जितसँगै सिटी ८ खेलबाट २० अंक जोडेर दोस्रो स्थानमा यथावत रहेको छ । सिटी शीर्षस्थानको आर्सनलसँग १ अंकले पछि छ । पराजित युनाइटेड ७ खेलबाट १२ अंक जोडेर छैटौं स्थानमा यथावत रहेको छ । यस्तै इंग्लिस प्रिमियर लिगअन्तर्गत गएरातिको खेलमा लिभरपुल बराबरीमा रोकिएको छ ।
लिभरपुल घरेलु मैदान एनफिल्डमा ब्राइटनसँग ३–३ को बराबरीमा रोकिएको हो । लिभरपुलका लागि रोबर्टो फिर्मिन्होले दुई गोल गर्दा एक गोल आत्मघाती उपहार प्राप्त भयो । ब्राइटनका लिन्ड्रो ट्रोसार्डले ह्याट्रिक गरे । खेलको चौथो मिनेटमा ट्रोसार्डले गोल गर्दै ब्राइटनलाई सुरुवाती अग्रता दिलाएका थिए ।
१७ औं मिनेटमा ट्रोसार्डले व्यक्तिगत दोस्रो गोल गर्दै पाहुना टोलीलाई २–० ले अघि बढाए । ३३ औं मिनेटमा फिर्मिन्होले गोल गरेपछि खेल २–१ को स्थितिमा आयो । ५४ औं मिनेटमा फिर्मिन्होले व्यक्तिगत दोस्रो गोल गर्दै लिभरपुललाई २–२ को बराबरीमा ल्याए ।
६३ औं मिनेटमा ब्राइटनका एडम वेब्स्टरले आत्मघाती गोल गरेपछि लिभरपुल ३–२ ले अघि बढ्यो । ८३ औं मिनेटमा ट्रोसार्डले ह्याट्रिक पूरा गर्दै ब्राइटनलाई ३–३ गोलको बराबरीमा ल्याए । यो नतिजासँगै ७ खेलमा १० अंक जोडेको लिभरपुुल नवौं स्थानमा रहँदा ब्राइटन समान खेलबाट १४ अंकका साथ चौथो स्थानमा छ ।
