२ भदौ , एजेन्सी ।
अल नासरलाई पराजित गर्दै साउदी सुपर कपको उपाधि अल हिलालले उचालेको छ । गएरातिको खेलमा अल हिलालले अल नासरलाई ४–१ गोलले हराउँदै उपाधि जितेको हो । पहिलो हाफमा एक गोलले पछि परेको अल हिलालले दोस्रो हाफमा चार गोल ग¥यो । त्यसअघि पहिलो हाफको ४४औँ मिनेटमा अल नासरका लागि कप्तान क्रिस्टियानो रोनाल्डोले गोल गर्दै शुरुवाती अग्रता बनाएका थिए ।
तर, अल नासरले यो अग्रतालाई जोगाउन नसक्दा उपाधि जित्न सकेन । उपाधि भिडन्तमा अल हिलालले अल नासरलाई पराजित गरेपछि पोर्चुगिज स्टार क्रिस्टियानो रोनाल्डो पुनः एकपटक साउदी अरबमा उपाधि जित्नबाट बन्चित भएका छन् । रोनाल्डोकै गोलमा अल नासरले अग्रता लिएपनि खेल जित्न भने सकेन ।
पहिलो हाफमा १–० ले अघि रहेको अल नासरले ४–१ को अन्तरमा खेल हार्न पुग्यो । सिजनको पहिलो उपाधि जित्ने अवसर गुमाएका रोनाल्डो २ वर्षे बसाईंमा उपाधि विहिन छन् । पांच पटकका ब्यालोन डी’ओर विजेता रोनाल्डोले पहिलो हाफको अन्तिम मिनेटमा अल नासरलाई अग्रता दिलाएका थिए ।
तर दोस्रो हाफको मध्यतिर १७ मिनेटको अन्तरमा अल हिलालले ४ गोल फर्काएको थियो । सर्गे मिलिन्कोभिच साभिचले ५५ औं मिनेटमा बराबरी गोल फर्काए । पहिलो गोल सिर्जना गरेका एलेक्जेन्डर मित्रोभिचले त्यसको ८ मिनेटपछि रुबेन नेभेसको क्रसमा हेडरमार्फत गोल गरे । मित्रोभिचले ६९ औं मिनेटमा माल्कमको पासमा गोल गर्दै अग्रता बढाए ।
७२ औं मिनेटमा माल्कमले अल नासरको डिफेन्समा भएको गल्तीको फाइदा उठाउँदै गोल थपे । अल हिलालाले लगातार दोस्रो पटक सुपर कप उपाधि जितेको हो । समग्रमा टोलीको यो पाँचौ सुपर कप उपाधि हो । गत सिजन अल हिलालले साउदी किंग्स कप र साउदी प्रो लिगमा अल नासरलाई पछि पारेको थियो ।
