९ साउन, विराटनगर ।
उदयपुर जिल्लाको ताप्ली र लिम्चुङबुङ गांउपालिकामा हेलिकप्टर मार्फत खाद्यान्न सामाग्रि पठाइएको छ । बाढीपहिरोको कारण सडकमार्ग अवरुद्ध भएर खाद्यान्न संकटको अवस्था सृजना भएपछि ती गाउँपालिकाहरुमा हेलिकप्टर मार्फत खाद्यान्न सामाग्रि पठाइएको हो ।
नेपाली सेनाको हेलिकप्टरले आज दिउँसो विराटनगर विमानस्थलबाट ती गांउपालिकाहरुमा चामल,दाल,नुन र तेल ओसारेको हो । विराटनगरबाट उडेको हेलिकप्टरले गरेर ४ खेप गरेर २÷२ पटक ती गांउपालिकाहरुमा खाद्यान्न लगेको छ । बाढी पहिरोका कारण ताप्ली र लिम्चुङबुङ गाउँपालिकालाई जोड्ने बाटाहरु अवरुद्ध भएका कारण सडकमार्गबाट त्यहाँ खाद्यान्न ढुवानी हुन नसकेपछि उत्पन्न भएको खाद्यान्न संकट न्युनिकरण गर्न हेलिकप्टरबाट खाद्यान्न पठाइएको हो ।
ती गाउँपालिकाहरुले खाद्यान्नको संकट सृजना भएको जानकारी गराएपछि आकस्मिकरुपमा बसेको प्रदेश विपद् ब्यवस्थापन कार्यकारी समितिको बैठकबाट ती क्षेत्रमा राहतस्वरुप खाद्यान्न पठाउने निर्णय भएको समितिका अध्यक्ष समेत रहेका प्रदेश १ का आन्तरिक मामिला तथा कानुन मन्त्री हिक्मतकुमार कार्कीले जानकारी दिए ।
ती २ गांउपालिकाहरुमा ७ दिनकालागि आवश्यकपर्ने ७ सय क्वीन्टल चामल तथा अन्य खाद्यान्नको ब्यवस्थापन गरिएको मन्त्रालयका निमित्त सचिव कमलबहादुर थापाले जानकारी दिए । ती सामाग्रीमध्ये बिहीबार हेलिकप्टरको चारपटकको उडानबाट ८० क्वीन्टल चामल,२० क्वीन्टल दाल,५ सय केजी नुन र ५ सय लिटर खानेतेल पठाइएको उनले जानकारी दिए।
बाढीपहिरोका कारण अवस्था जटिल भएपछि लिम्चुङबुङ गाउँ कार्यपालिकाले गएको असार ३१ गते गांउपालिकालाई संकटग्रस्त घोषणा गरेको थियो । गाईघाटबाट ७५ किलोमिटर बढी दुरीमा रहेको लिम्चुङबुङ गांउपालिकालाई जोड्ने सबै बाटाहरु अवरुद्ध भएपछि खाद्यान्न संकट उत्पन्न भएको गांउपालिका प्रमुख मेजर कुमार राईले जानकारी दिए ।
