१९ भदौ, एजेन्सी ।
आईसीसी एकदिवसीय विश्वकप क्रिकेट प्रतियोगिताका लागि भारतीय टोलीको घोषणा गरिएको छ । विश्वकप क्रिकेटको १३औं संस्करण अक्टोबर ५ देखि नोभेम्बर १९ सम्म भारतमै आयोजना हुँदैछ । रोहित शर्माको कप्तानीमा विश्वकपका लागि घोषणा गरिएको भारतीय टोलीमा युवा र अनुभवी खेलाडीको समिश्रण रहेको छ ।
हाल श्रीलंकामा एसिया कप खेलिरहेको टोलीका खेलाडीहरुलाई समेटेर नै विश्वकपका लागि भारतीय टोलीको घोषणा गरिएको छ । तर, एसिया कप खेलिरहेका केही खेलाडीलाई भने विश्वकपका लागि घोषित टोलीबाट हटाइएको छ । मध्यक्रमका ब्याट्सम्यान तिलक वर्मा, तीव्र गतिका बलर प्रसिद्ध कृष्णा र सञ्जु सामसनलाई विश्वकपका लागि घोषित टोलीमा समावेश गरिएको छैन ।
घोषित भारतीय टोलीमा रोहित शर्मा (कप्तान), शुभमन गिल, विराट कोहली, श्रेयस ऐयर, इशान किसन, केएल राहुल, हार्दिक पाण्डेया (उपकप्तान), सूर्यकुमार यादव, रविन्द्र जडेजा, अक्सर पटेल, सार्दुल ठाकुर, जसप्रित बुमराह, मोहम्मद सामी, मोहम्मद सिराज र कुलदिप यादव रहेका छन् । टीम इन्डियाले आफ्नो पहिलो खेल अक्टोबर ८ मा अष्ट्रेलियासँग चेन्नईमा खेल्नेछ ।
प्रतियोगिताको यस संस्करणमा भारतसहित कुल १० टिम सहभागी छन् । आईसीसीको नियम अनुसार विश्वकपमा सहभागी सबै देशले ५ सेप्टेम्बर सम्ममा आफ्नो टोली घोषणा गर्नुपर्ने थियो । यद्यपि सेप्टेम्बर २७ सम्म टोलीमा परिवर्तन गर्न सकिनेछ । सन् २०११ यता आईसीसी प्रतियोगितामा जितको हिसाबले भारतको कीर्तिमान राम्रो रहेको छैन् ।
भारतले ११ खेलमा एउटा मात्र जितेको छ । उसले पछिल्लो पटक २०१३ च्याम्पियन्स ट्रफीमा सफलता हात पारेको थियो । महेन्द्र सिंह धोनीको कप्तानीमा २०११ को विश्वकप जितेपछि भारतीय टोलीले २०१२ को टि २० विश्वकपमा निराशाजनक प्रदर्शन गरेको थियो। त्यसपछि टोली सुपर–८ बाट बाहिरिएको थियो ।
तर, धोनीले सन् २०१३ मा टोलीको नेतृत्व गर्दै इङ्ल्यान्डमा भएको च्याम्पियन्स ट्रफीमाथि कब्जा जमाएका थिए । उनी टी–२० विश्वकप, एकदिवसीय विश्वकप र च्याम्पियन्स ट्रफी जित्ने एकमात्र कप्तान बनेका छन् । त्यसयता भारतले आईसीसीका हरेक प्रतियोगितामा निराशाको सामना गरेको छ ।
रोहित शर्माको कप्तानीमा भारतीय टोलीले तेस्रो पटक आईसीसी प्रतियोगिता खेल्ने भएको छ । अहिलेसम्म उनले उपाधि उचाल्ने मौका पाएका छैनन् । आईपीएलमा कप्तानको रूपमा पाँच उपाधि जितेका रोहित भारतका लागि ट्रफी जित्न आतुर छन् ।
उनले पहिलो पटक एकदिवसीय विश्वकपमा टोलीको कप्तानी गर्नेछन् । सन् १९७५ यता भारतले १९८३ र २०११ म मात्रै विश्वकप जितेको छ । अहिलेसम्म अष्ट्रेलियाले सर्वाधिक ५ पटक आईसीसी एकदिवसीय विश्वकप क्रिकेटको उपाधि जितेको छ ।
