२ पुस , काठमाण्डौ ।
ह्युमानोइड रोबोट प्रविधिमा तीव्र विकास भइरहेका बेला चीनले विश्वकै सबैभन्दा सस्तो ह्युमानोइड रोबोट सार्वजनिक गरेको छ । ‘बुमी’ नामक यस रोबोटको मूल्य केवल ९ हजार ९९८ युआन (करिब १ हजार ४०० अमेरिकी डलर) तोकिएको छ ।
यो रोबोट विशेष गरी बालबालिकासँग संवाद गर्न, शिक्षा दिन तथा रोबोटिक्स र एआई सिकाउन डिजाइन गरिएको हो । चीनको यो पहलले विश्व रोबोटिक्स बजारमा ठूलो प्रभाव पार्ने अपेक्षा गरिएको छ ।
बुमी हल्का तौल र सानो आकारको ह्युमानोइड रोबोट हो । यसले हिँड्न, दौडन, नाच्न र मानिससँग कुराकानी गर्न सक्छ । ड्र्याग–एन्ड–ड्रप टुल प्रयोग गरेर सजिलै प्रोग्राम गर्न सकिने भएकाले यो विद्यालय, विश्वविद्यालय र परिवारहरूका लागि किफायती विकल्प बनेको छ ।
महँगा ह्युमानोइड रोबोट किन्न नसक्ने शैक्षिक संस्थाहरूका लागि बुमीले रोबोटिक्स शिक्षामा नयाँ अवसर खोल्ने विश्वास गरिएको छ । बुमीको व्यावसायिक बिक्री जनवरी २०२६ बाट सुरु हुने कम्पनीले जनाएको छ ।
यससँगै चीन आम उपभोक्तालाई लक्षित ह्युमानोइड रोबोट बजारमा अग्रणी राष्ट्रको रूपमा उभिने तयारीमा देखिएको छ । चीनको सोंगयान पावर कम्पनीले हुआईचेन टेक्नोलोजीसँग सम्झौता गर्दै १ हजार वटा बुमी ह्युमानोइड रोबोट आपूर्ति गर्ने सहमति गरेको छ ।
अमेरिकामा विकसित ह्युमानोइड रोबोटहरू हाल अत्यन्तै महँगा छन् । टेस्लाको अप्टिमस रोबोटको अनुमानित मूल्य २० हजारदेखि ३० हजार डलरसम्म हुनसक्छ भने एजिलिटी रोबोटिक्सको डिजिट रोबोटको मूल्य करिब २ लाख ५० हजार डलर रहेको छ ।
यी रोबोटहरू उद्योग र गोदामका लागि डिजाइन गरिएका हुन् । यसको विपरीत, चीनले कम लागतमा उत्पादन गरी व्यापक प्रयोगमा ल्याउने रणनीति अपनाएको देखिन्छ ।
ह्युमानोइड रोबोट भनेका मानिसजस्तै आकार, हाउभाउ र व्यवहार गर्न सक्ने रोबोट हुन् । यस्ता रोबोटले हिँड्न, बोल्न र मानवसँग अन्तरक्रिया गर्न सक्छन् ।