११ भदौ, विराटनगर ।
इटालीका पूर्वगोलरक्षक जियानलुइगी बुफोन ‘युइएफए’को प्रेसिडेन्ट्स अवार्डबाट सम्मानित हुने भएका छन् । गत वर्ष नै खेलजीवनबाट सन्न्यासको घोषणा गरेका बुफोनलाई इटालीको फुटबल क्षेत्रमा पुर्याएको योगदानको कदर गर्दै ‘युइएफए’को प्रेसिडेन्ट्स अवार्डबाट सम्मान गर्ने भएको हो ।
फुटबलमा सफलता हासिल गरेका र व्यक्तिगत रूपमा पनि पृथक पहिचान बनाएका व्यक्तित्वलाई यो सम्मान प्रदान गरिँदै आएको छ । युइएफएका प्रेसिडेन्ट एलेक्जेन्डर सेफरिनले सन् २०२४ को उक्त अवार्ड ४६ वर्षीय बुफोनलाई प्रदान गरिने बताएका छन् ।
करिब २८ वर्षजति इटालीसहित युरोपका विभिन्न क्लबहरूमा गोलरक्षकको भूमिका निभाएका बुफोनलाई आगामी बिहीबार मोनाकोमा उक्त अवार्ड प्रदान गरिने बताइएको छ ।
सन् १९९५ मा इटालीबाट डेब्यु गरेका बुफोनले विश्वकपको उपाधिसमेत जितिसकेका छन् । इटालीका लागि सर्वाधिक धेरै खेल खेल्ने खेलाडीसमेत हुन्, बुफोन । सन् २००६ मा जर्मनीमा भएको विश्वकपमा उनले इटालीलाई उपाधि दिलाएका थिए ।
राष्ट्रका लागि १७६ खेल खेलेका बुफोनले पिएसजी र युभेन्टसहित तीनवटा क्बलबाट ९७५ खेल खेलेका छन् ।
