८ भदौ, विराटनगर ।
मिस्टर आइसिसी भनेर चिनिने भारतीय क्रिकेटर शिखर धवनले अन्तर्राष्ट्रिय र घरेलु क्रिकेटका सबै फर्म्याटबाट सन्न्यासको घोषणा गरे । शनिबार सामाजिक सञ्जालमा एउटा भिडियो सार्वजनिक गर्दै क्रिकेटबाट अलग भएको सुनाएका हुन् ।
धवनले भिडियोमा आफ्नो बाल्यकालका क्रिकेट प्रशिक्षकदेखि भारतीय क्रिकेट बोर्डसम्मलाई सम्झिए । आफूलाई क्रिकेटमार्फत् विश्वमाझ चिनाउनेप्रति नतमस्तक देखिएका उनले सबैलाई धन्यवाद दिए । भारतका लागि खेल्ने आफ्नो सपना पूरा भएको उल्लेख गर्दै धवनले क्रिकेट यात्रालाई बिट मार्ने निधोमा पुगेको सुनाए ।
‘लेफ्ट ह्यान्डेड’ ब्याट्सम्यान धवनले सन् २०१० मा भारतका लागि डेब्यु गरेका थिए । अस्ट्रेलियाविरुद्ध विशाखापट्टनममा भएको एकदिवसीय अन्तर्राष्ट्रियमार्फत भारतका लागि डेब्यु गरेका उनले १३ वर्ष लामो अन्तर्राष्ट्रिय क्रिकेट करियर बिताए ।
भारतीय टोलीका ‘ओपनर ब्याटर’ को भूमिकामा प्रस्तुत हुने धवनले सन् २०१३ मा भएको आइसिसी च्याम्पियन ट्रफीमा उत्कृष्ट साबित भएका थिए । इंग्ल्यान्ड र वेल्समा भएको उक्त प्रतियोगितामा भारतले घरेलु टोली इंग्ल्यान्डमाथि ५ रनको जित निकाल्दा धवनले उल्लेखनीय योगदान गरेका थिए । उक्त सिरिजमा सर्वाधिक धेरै ३६३ रन बनाएका धवन उत्कृष्ठ ठहरिएपछि टोलीमा उनको नाम नै मिस्टर आइसिसी रहन गएको थियो ।
सोही वर्ष टेस्ट क्रिकेटमा डेब्यु गरेका धवनले अस्ट्रेलियाविरुद्ध १८७ रनको योगफल बनाउँदै कीर्तिमानी रचेका थिए । त्यसबेला उनी टेस्ट क्रिकेटको डेब्यु खेलमा सर्वाधिक धेरै रन बनाउने भारतीय खेलाडी बन्न सफल भएका थिए । सन् २०१३ मा इन्डिया ‘ए’ का लागि खेलेका धवनले साउथ अफ्रिका ‘ए’ विरुद्ध २४८ रन बनाएर सनसनी मच्चाएका थिए ।
सन् २०१५ मा भएको विश्वकपमा भारतका लागि सर्वाधिक धेरै रन बनाउने खेलाडी बन्न सफल धवनले २०११ देखि २०२२ सम्म भारतीय टिमका लागि खेले । तर, पछिल्लो दुई वर्षयता राष्ट्रिय टिमबाट बाहिर रहेका धवनलाई सुभमन गिलले प्रतिस्थापन गरेका थिए ।
धवनले टेस्ट क्रिकेटमा २ हजार ३ सय १५ रन बनाएका छन् भने सात शतक र पाँच अर्धशतक प्रहार गरेका छन् । त्यस्तै १ सय ६७ ओडीआई खेलेका धवनले १७ शतक र ३९ अर्धशतकसहित ६ हजार ७ सय ९३ रन बनाएका छन् । टी–२० मा धवनले ६८ खेलमा १ हजार ७ सय ५९ रन बनाएका छन् ।
धवनले अन्तिम पटक गत अप्रिलमा इन्डियन प्रिमियर लिग (आइपिएल)मा पञ्जाब किंग्सको नेतृत्व गरेका थिए । सन् २००८ मा तत्कालीन दिल्ली डेयरडेभिल्सबाट आइपिएल खेल्न थालेका धवनले मुम्बई इन्डियन्स, डिक्यान चार्जेस, सनराइजर्स हैदराबाद, दिल्ली क्यापिटल्स र पञ्जाब किंग्समा अनुभव संगालेका छन् । आइपिएलमा लगातार शतक हान्ने पहिलो खेलाडी पनि बनेका थिए, धवन । त्यसबाहेक आइपिएलमा धेरै चौका प्रहार गर्ने खेलाडी पनि हुन्, उनी ।
आइपिएलमा सर्वाधिक रन बनाउने विराट कोहलीभन्दा एक स्थान पछि छन्, उनी । धवनले आइपिएलमा ६ हजार ७६९ रन बनाएका छन् भने शीर्ष स्थानका विराटले आठ हजार ६ रन बनाएका छन् । सन् २०१६ मा सनराइज हैदराबादलाई आइपिएलको उपाधि दिलाउन उनको भूमिका अहम् छ । धवनले हैदराबाद र पञ्जाब किंग्स दुवैको कप्तानी गरेका थिए, जुन अहिलेसम्म आइपिएलको इतिहासमा अरू कसैले गरेको छैन ।
उमेरका हिसावले भन्नुपर्दा ३८ वर्षीय धवनले अहिले नै क्रिकेटबाट अलग हुनुपर्ने अवस्था आइसकेको थिएन । किनकि, ४३ वर्षीय महेन्द्रसिंह धोनी अझै क्रिकेट क्रिजमा रहन्छन् । ३९ वर्षीय क्राइग रिचार्ज एर्भाइनले अझै जिम्बावेका लागि खेलिरहेका छन् । सन् २०१० मा भारतका लागि डेब्यु गरेका रविचन्द्रन अश्विन धवनभन्दा केही दिनमात्र कान्छा हुन्, तर अहिले पनि उनी भारतको पहिलो रोजाइकै खेलाडीका रूपमा मैदान उत्रिन्छन् ।
हो, राष्ट्रिय टोलीमा स्थान बनाउन नसके पनि क्लब क्रिकेटमा अझै उनले गर्नसक्ने धेरै चिज बाँकी थियो । तथापि, अब उनले खेल्न छोडे पनि क्रिकेट नछोडुन् । प्रशिक्षक होस् वा व्यवस्थापक भएर होस्, क्रिकेटका लागि योगदान गरिरहुन् ।
