विराटनगर, कार्तिक ५
नेपाली कांग्रेसका उपसभापति विमलेन्द्र निधिले सरकारले जनताको पक्षमा काम गर्न नसकेको आरोप लगाएका छन् । विराटनगर विमानस्थलमा सञ्चारकर्मीहरुसँगको साक्षात्कारमा उनले यस्तो बताएका हुन् ।
निधिले वर्तमान सरकारले दुई तिहाईको सरकार भएर पनि जनताको पक्षमा कुनै काम गर्न नसकेको दाबी गरे । उनले पछिल्लो समय नेकपाका समर्थकहरुले समेत सरकारले संविधान र जनताको पक्षमा कुनै काम गर्न नसकेको बिषय उठाइरहेको बताए ।
उपसभापति निधिले कांग्रेस परिपक्व र ऐतिहासिक अनुभव हासिल गरेको पार्टी रहेको धारणा राख्दै कांग्रेसले अहिले सरकारको अर्कमण्यतालाई जनता समक्ष राख्ने काम गरिरहेको बताए ।
उनले संघीय लोकतान्त्रिक गणतन्त्रलाई सुदृढ गर्न र जनताको पक्षमा काम गर्न कांग्रेस प्रतिबद्ध रहेको प्रष्ट पारे । उपसभापति निधिले आन्तरिक निर्वाचन प्रणाली अवलम्बन गरेको कांग्रेसजस्तो नेपालमा अन्य कुनै पार्टी नरहेको धारणा राखे ।
उनले विधान संशोधन र महासमितिको बैठकपछि पार्टीभित्र देखिएको गुट उपगुट अन्त्य हुने दाबीसमेत गरेका छन् ।
